نوسینگەی سەرۆک وەزیرانی عێراق راگەیندراوێکی بڵاوکردەوە و تێیدا هاتوە؛  لە چوارچێوەی پابەندبون بە جێبەجێکردنی یاسای بودجەی گشتی و بڕیارەکانی دادگای فیدراڵی، لیژنەیەکی باڵا بە سەرۆکایەتیی وەزیری پلاندانان پێکهێنراوە بۆ تاوتوێکردنی پرسی داهات و موچەی هەرێمی کوردستان.

هەواڵ:KNNC

لە راگەیندراوەکەدا هاتوە؛ ئەم بڕیارە دوای ئەوە دێت کە ئەنجومەنی وەزیران گفتوگۆی لەسەر دو پڕۆپۆزەڵ کرد؛ یەکێکیان لەلایەن حکومەتی فیدراڵی و ئەوی دیکەیان لەلایەن حکومەتی هەرێمی کوردستانەوە پێشکەش کرابو.

ئاماژەبەوەشکراوە، پڕۆپۆزەڵەکان تایبەت بون بە ڕادەستکردنی داهاتە نەوتی و نانەوتییەکانی هەرێم و پرسی موچەی فەرمانبەران و بەبانکیکردنی.

بۆ ئەو مەبەستەش سەرۆک وەزیران بڕیاریدا، بە پێکهێنانی لیژنەیەک بە سەرۆکایەتیی جێگری سەرۆک وەزیران و وەزیری پلاندانان، و بە ئەندامێتیی وەزیرانی ئاوەدانکردنەوە و نیشتەجێکردن، خوێندنی باڵا، داد، و تەندروستی.

ئەرکی لیژنەکە گفتوگۆکردنە لەسەر هەردو پڕۆپۆزەڵەکە لەگەڵ سەرجەم لایەنە پەیوەندیدارەکانی حکومەتی فیدراڵی و حکومەتی هەرێم، و دواتر ڕاسپاردەکانی خۆی پێشکەش بە ئەنجومەنی وەزیران دەکات، تاوەکو لە نزیکترین کاتدا بڕیاری پێویستی لەبارەوە بدرێت.