دەزگای شەهیدانی عێراق رایگەیاند، لە ساڵی 2008ـەوە تا ئێستا روفاتی هەزار و 1700 کەس کە سەرجەمیان کوردن لە گۆرە بەکۆمەڵەکان دەرهێنراون.

هەوال:KNNC

عەبدولئیلا ئەلنەیلی، سەرۆکی دەزگای شەهیدانی عێراق لە بەیاننامەیەکدا رایگەیاند، بەڕێوەبەرایەتی گۆڕە بەکۆمەڵەکان لە ساڵی 2008ـەوە تا ئێستا 30 گۆڕی بەکۆمەلیان هەڵداوەتەوە کە سەرجەمیان کورد بون و روفاتی ئەو کەسانەش کە دەرهێنراونەتەوە گەیشتە هەزار و 700 کەس.

راشیگەیاند، بەڕێوەبەرایەتییەکەیان روبەڕوی کێشەی گەورە دەبێتەوە لە دیاریکردنی ناسنامەی روفاتەکان، بەوپێیەی زۆرێک لە خانەوادەی شەهیدەکان یان کۆچی دواییان کردوە یان گەشتیان کردوە و وڵاتیان بەجێهێشتوە، هەروەها کەسانێکیش هەن شوێنی نیشتەجێبونیان دەستنیشان نەکراوە.

ئاشکراشیکرد، پلانیان هەیە بۆ کردنەوەی چەند بەڕێوەبەرایەتییەک کە یەکێکیان تایبەتە بە کاروباری کورد بۆئەوەی لەرێگەی ئەوانەوە هەماهەنگی لەگەڵ وەزارەتی کاروباری شەهیدان و ئەنفالکراوانی هەرێم بکات، هاوکات لە پرۆسەی دامەزراندنی تۆمارێکی نیشتیمانیدان بۆ کەسانی ونبو، کە سەرجە، ناونیشان و ناوی قوربانیانی نەتەوە جیاوازەکانی عێراق لەخۆدەگرێت کە لە گۆڕە بەکۆمەڵەکاندا دۆزراونەتەوە.