هاتوچۆی سلێمانی دەنگۆیەك رەت دەكاتەوە و دەڵێت: رەشكردنی جامی بەردەم شۆفێر و جامی سەر سندوق قەدەغەیە لەبەر ئەوەی ئاستی بینین کەم دەکاتەوە، هەركەسێكیش سەرپێچی بكات بێجگە لەوەی سێ رۆژ دەست بەسەر ئۆتۆمبیلەكەیدا دەگیرێت بەبڕی (500) هەزار دینار سزا دەدریت.

هەواڵ: (KNNC)

بەڕێوەبەرایەتی هاتوچۆی سلێمانی رایگەیاند: بەپێچەوانەی ڕێنماییەکانی جام ڕەشکردنی ئۆتۆمبێل لە سۆشیال میدیاو ئەو دوکانانەی کە کاری جوانکاری ئوتومبێل ئەنجام دەدەن بڵاوکراوەتەوە بەناو هاوڵاتییاندا کە گوایە جامی بەردەم شۆفێر و جامی سەر سندوق (جامی دواوە) ئاساییە جام رەش بکات، بەڵام ئەم دەنگۆیانە دورن لە ڕاستییەوەو قەدەغەیە لەبەرئەوەی ئاستی بینین کەم دەکاتەوە و پێویستە بەپێی ڕێنماییەکان کاریان بۆ بکرێت.

بڵاویشیكردوەتەوە كە، شۆفێران و دوکانەکانی جوانکاری ئۆتۆمبێل ئاگادار دەکەنەوە لە کڕین و فرۆشتنی (لۆگۆی رێژە / ستیکەر) و گۆڕینی لەزگەی جامی ئۆتۆمبێل دوای رەزامەندی وەرگرتن لە بەڕێوەبەرایەتیەكەیان بەڕێژەی بەرزتر قەدەغەیە و سەرپێچیکار ڕوبەڕوی یاسا دەکرێتەوە.

هاتوچۆی سلێمانی ئاماژەی بۆ ئەوەشكردوە، سەرجەم مەفرەزە گەڕۆکەکانی هاتوچۆ ئاگادارکراونەتەوە ئامێری پێوەری رێژەی جام رەشکردن بەکاربهێنن تا ئەو دیاردەیە بنەبڕ بکرێت و هەر شۆفێری ئوتومبێلێک پێچەوانەی ڕێنماییەکان ئوتومبێلەکەی جام ڕەش بکات بەبڕی (500) سەد هەزار دینار سزا دەدرێت هاوكات بۆ ماوەی سێ رۆژ دەست بەسەرداگرتنی ئۆتۆمبێلەکەیدا دەگیرێت.