لەسلێمانی قۆناغی دووەمی کامێرای خاڵ بۆ خاڵ جێبەجێدەکرێت و بەپێی زانیارییەکانی KNN، لەماوەی رابردو بەهۆی خراپی دۆخی دارایی هاوڵاتیان بۆماوەی چەند مانگێک کامێراکان کوژێنراونەتەوە.

هەواڵ:KNNC

پەیامنێری کەی ئێن ئێن لە سلێمانی رایگەیاند، بەپێی گرێبەستی نێوان کۆمپانیای جێبەجێکار و حکومەتی هەرێم، کامێراکانی خاڵ بۆ خاڵ تەنیا لەسەر رێگەی دوکان- سلێمانی جێگیر ناکرێن بەڵکو بە سێ قۆناغ کامێراکان دادەنرێن و لە تەواوی رێگە سەرەکییەکان کامێرای تۆمارکردنی سەرپێچی دادەنرێن.

وتیشی، لە ئێستادا دەستکراوە بە جێبەجێکردنی قۆناغی دووەمی پرۆژەکە لەسەر رێگەی سلێمانی – چەمچەماڵ کامێرای خاڵ بۆ خاڵ دادەنرێت لە ئێستاشدا کۆمپانیای جێبەجێکراو سەرقاڵی راکێشانی هێڵی ئینتەرنێت-ن بۆ کامێراکان.

پەیامنێری کەی ئێن ئێن دەشڵێت: لە قۆناغی سێیەمی پرۆژەکەدا کامێراکانی خاڵ بۆ خاڵ لەسەر رێگەی سلێمانی- هەڵەبجە، جێگیردەکرێن.

لەسەر رێگەی سلێمانی- دوکان 24 کامێرا جێگیر کراوە، 12 کامێرایان بۆ رۆشتن و 12 کامێراش بۆ هاتنە بۆ ناو شاری سلێمانی، لەسەر رێگەی سلێمانی- چەمچەماڵیش 24 کامێرا دادەنرێت.

جگەلەوەش لە سنوری پارێزگای سلێمانی 21 کامێرای جێگری رادار جێگیرکراون، تەنیا چوار لەو کامێرایانە کارناکەن.

کەی ئێن ئێن ئەوەشی زانیوە، لەماوەی رابردو و لەکاتی قەیرانی دارایی و دواکەوتنی موچە، بۆماوەی چەند مانگێک کامێراکان ناوبەناو کوژێنراونەتەوە، بەڵام دواتر بە جێگیری خراونەتەوە کار.

دانانی کامێرای خاڵ بۆ خاڵ، مانگی ئازاری ساڵی ڕابردو بەپێی گرێبەستێک لەنێوان حکومەتی هەرێم و کۆمپانیایەکی تایبەتدا چوە بواری جێبەجێکردن، هەرچەندە ناڕەزایەتییەکی بەرفراوانی هاوڵاتیان و شۆفێرانی لێکەوتەوە بەڵام بەرپرسانی حکومەت جەخت دەکەنەوە کە دانانی کامێراکان، هۆکارێکی باش بوە بۆ کەمکردنەوەی روداوەکانی هاتوچۆ.