ڕێکخراوێکی ژینگەیی هۆشداری لە بەکارهێنانی سفرەی سەفەری دەدات

KNN : Kurdish News Network
09:08 - 18/08/2022
کوردستان

سەرۆکی ڕێکخراوی ئایندە بۆ پاراستنی ژینگە هۆشداری لە بابەتێکی مەترسیداری ژینگەیی دەدات و دەڵێت: ڕۆژانە لە هەرێمی کوردستان  بە درێژایی دو هەزار و 300 کیلۆمەتر سفرەی سەفەری (نایلۆن) فڕێدەدرێتە ناو سروشتەوە.

مەعروف مەجید، سەرۆکی ڕێکخراوی ئایندە بۆ پاراستنی ژینگە لە نوسینێکدا باس لەوە دەکات، ڕۆژانە لە کوردستان بەهەزاران تەن پاشماوەی پلاستیکی و نایلۆن دەخرێتە ناو ژینگە و سروشتەوە، بە جۆرێک ڕۆژانە بە درێژایی، 2300 کیلۆمەتر سفرەی سەفەری فڕێدەدرێتە ناو سروشتەوە، ئەمە جگە لە چێشتخانە و فەرمانگە حکومییەکان و نەخۆشخانەکان و زیندانەکان و دەیان شوێنی تر.

ئاماژە بەوەش دەکات، ڕۆژانە زیاد لە حەوت هەزار تۆن پاشماوە لە کوردستان بونی هەیە کە (35٪)ی پلاستیک و نایلۆنە.

سەرۆکی ڕێکخراوی ئایندە بۆ پاراستنی ژینگە ئاماژەی بەوەشکردەوە، دانیشتوانی کوردستان یەک ملیۆن و سەدو پەنجا هەزار خێزانە و ئەگەر ڕۆژانە هەر خێزانێک تەنها دو مەتر سفرەی سەفەری بەکاربهێنن، کە دڵنیاین زۆر زیاترە، دەکاتە (دو ملیۆن و سێ سەد هەزار مەتر) سفرەی سەفەری.

265 جار خوێندراوەتەوە