وێنە؛ چی دەزانی دەربارەی (چەمی ئەشکەوتان) کە زیاتر لە 100 ئەشکەوتی تێدایە

KNN : Kurdish News Network
07:14 - 14/05/2022
گەلەری

چەمی ئەشکەوتان، گوندێکى ئەفسوناوى ناوچەى هەورامانە لە باشورى کوردستان، لە رابردودا یەکێک بوە لە گوندە ئاوەدانەکانی ناوچەکە و لە ئێستاشدا هیچ ماڵێکی تێدا نییە.

چەمی ئەشکەوتان بە هەورامی پێێ دەڵێن دەرەی مەڕ، لە زاراوەی هەورامیدا دەرە بەمانای چەم و مەڕیش بەمانای ئەشکەوت دێت، بۆیە گوندەکە هەر بە دەرەی مەڕ ناسراوە.

 لە دوای راپەڕینی ساڵی 1991 یەکێک بوە لەو گوندانەی ئاوەدانکراوەتەوە و تا ساڵی 2003 دانیشتوانەکەی تێیدا ژیاون و ماوەی 19 ساڵە چۆڵە و کەسی تێدا ناژی.

گوندەکە لە نێوانى دوو چیادایە و زیاتر لە 100  ئەشکەوتی تێدایە، بەشێک لە ئەشکەوتەکان سروشتین و بەشێکی دیکەشیان خەڵکی گوندەکە بە پاچ  و قوڵینە هەڵیانکەندووە و وەک خانو بەکاریان هێناوە و تێیدا ژیاون کە ئەوەش دیمەنێکى جوان و سەرنجڕاکێشى نەخشاندووە.

دەرەی مەڕ یاخود چەمی ئەشکەوتان بە دوری 10 کیلۆمەتر دەکەوێتە خۆرهەڵاتی ناحییەی خورماڵەوە لە پارێزگاى هەڵەبجە، هاوسێی گوندەکانی هانەی دن و سەرگەت و شەڕواڵدڕە کە تا ئێستاش خەڵک تێیدا دەژین و ئاوەدانن.

 

ئامادەکردن و فۆتۆ؛ بڵند عەبدولکەریم

479 جار خوێندراوەتەوە