بەتۆمەتى دزین و بە قاچاخ بردنى کەلوپەل و پارچەى مێژویى، هاوڵاتییەکى بەریتانى روبەڕوى سزاى لە سێدارەدان دەبێتەوە لەلایەن عێراقەوە.

جیم فیتۆنى تەمەن 66 ساڵ کە شوینەوارناسێکى بەریتانیە لە گەشتێکیدا لە ناوچەیەکى شوێنەوارى عێراق، چەندین پارچەى بە نرخى کەلەپورى و مێژویى و کۆن کۆدەکاتەوەو بە نیازى ئەوە بوە بیباتە دەرەوەى عێراق، بەلآم لەلایەن ئاسایشى فڕۆکەخانەوە دەستگیر دەکرێت دواتر روبەڕوى سزاى لەسێدارەدان دەبێتەوە.

هاوسەر و منداڵەکانى ئەم شوێنەوارناسە کە لە مالیزیا دەژین داواى بەهاناوە چون دەکەن و دەڵین: دەزانین کە سزاى بە قاچاخ بردنە دەرەوەى کەلوپەلە مێژوییەکان سزایەکى قورسە، بەڵام ئەو پارچانەى جیم فیتۆنى کۆى کردوەتەوە هەموو پارچە پارچە بون و لەڕوى مێژویى و ئابورییەوە هیچ بایەخیکى ئەوتۆى نەبووە.

رونیشیان کردۆتەوە کە لەو ناوچەیەى کەلوپەلەکانى لێ کۆکردۆتەوە، هیچ نیشانە و ئاماژەیەکى لێنەبووە تا پێیان بڵێت ئەمانە کەلوپەلى مێژویى و کۆنن و نابێت هەڵبگیرێنەوە.

لاى خۆیەوە،ـ وەزارەتى دەرەوەى بەریتانیا لەسەر دەستبەسەرکردنى ئەو شوێنەوارناسە هاتوەتە سەرخەت و پشتیوانى خۆیان بۆ خۆیى و خێزانەکەى دەربڕیوە.

بەپێى هەواڵى میدیاکان، چاوەڕێ دەکرێت دواى پشوى جەژنى رەمەزان، سزا بەسەر ئەو شوێنەوارناسەدا دەسەپێت.