وتەبێژى حکومەتى هەرێمى کوردستان هۆکارى گرانبونى نرخى بەنزین ئاشکرا دەکات و پلانى حکومەتى هەرێمیش بۆ چارەسەرکردنى دەخاتەڕوو.

سەبارەت بە هۆکارى گرانبوونى نرخى بەنزین، د. جوتیار عادل، وتەبێژى حکومەتى هەرێمى کوردستان لە راگەیەنراوێکدا رایگەیاندوە، هەناردەکردنی بەنزین بۆ هەرێمی کوردستان لە هەندێک دەروازە راگیراوە.

ئاماژەى بۆ ئەوەشکردوە، سه‌رۆكی حكومه‌تی هه‌رێمی كوردستان ‌وه‌زاره‌تی سامانه‌ سروشتییه‌كانی ڕاسپاردووه‌ بۆ چاره‌سه‌ركردنی به‌شێك له‌ گرفته‌كان سه‌ردانی به‌غداد بكه‌ن.

سەبارەت بە نەوتى دابەشکردنى سپی، وتەبێژى حکومەتى هەرێمى کوردستان ئاشکرایکردوە، وه‌زاره‌تی سامانه‌ سروشتییه‌كان ڕاسپێردراوه‌ له‌ زووترین كاتدا نەوتى سپى دابین بکات و دابەشى بکات بەسەر هاوڵاتیاندا.

دەقى راگەیەنراوەکەى وتەبێژى حکومەتى هەرێمى کوردستان

 
حكومه‌تی هه‌رێمی كوردستان له‌ ماوه‌ی ڕابردوودا به‌رده‌وام له‌ هه‌وڵی ئه‌وه‌ دابووه‌ به‌نزین بۆ هاووڵاتیان دابین بكات به‌ نرخێكی گونجاو، به‌ڵام به‌ هۆی ئه‌وه‌ی به‌شێكی زۆری به‌نزین له‌ ده‌ره‌وه‌ی هه‌رێم هاورده‌ ده‌كرا كه‌ ئه‌وه‌ش په‌یوه‌ست بوو به‌ نرخی نه‌وت، و له‌ ڕابردووشدا نرخی نه‌وت لەسەر ئاستی جیهاندا به‌رزبۆوه‌ كه‌ هاوكات بووه‌ هۆی به‌رزبوونه‌وه‌ی نرخی به‌نزینیش، هەروەها هەناردەکردنی بەنزین بۆ هەرێمی کوردستان لە هەندێک دەروازە راگیراوە، بۆیه‌ سه‌رۆكی حكومه‌تی هه‌رێمی كوردستان ‌وه‌زاره‌تی سامانه‌ سروشتییه‌كانی ڕاسپاردووه‌ سه‌ردانی به‌غداد بكه‌ن بۆ گفتوگۆكردن به‌ مه‌به‌ستی چاره‌سه‌ركردنی به‌شێك له‌ گرفته‌كان، له‌ لایه‌كی دیكه‌شه‌وه‌ سه‌رۆكی حكومه‌ت وه‌زاره‌تی سامانه‌ سروشتییه‌كانی ڕاسپاردووه‌ هه‌ماهه‌نگی بكه‌ن له‌گه‌ڵ كه‌رتی تایبه‌ت بۆ ئه‌وه‌ی پلانی گونجاو بۆ هاورده‌كردنی به‌نزین دابنرێت تاوه‌كو له‌ داهاتوودا قه‌یران دروست نه‌بێت.

سه‌باره‌ت به‌ نه‌وتی سپی، وه‌زاره‌تی سامانه‌ سروشتییه‌كان ڕاسپێردراوه‌ بۆ چاره‌سه‌ركردنی ئه‌م بابه‌ته‌ له‌ ڕێگه‌ی دابینكردنی نه‌وتی سپی و دابه‌شكردنی به‌سه‌ر هاووڵاتیان له‌ زووترین كاتدا. بۆیە هاوڵاتیان دڵنیا دەکەینەوە کە حکومەت هەموو هەوڵێک دەدات بۆ چارەسەر کردنی ئەم گرفتە.

د جوتیار عادل
وتەبێژی حکومەتی هەرێمی کوردستان
١٤ی تشرینی یەکەمی ٢٠٢١