ئەمەریکا بەفێڵێکى دیبلۆماسى شیعەکان دڵخۆش دەکات و بنکە سەربازیەکانشى دەپارێزێت

KNN : Kurdish News Network
10:15 - 28/07/2021
ڕاپۆرت

كۆتاییهێنان بە ئەرکى هێزە شەڕکەرەکانى ئەمەریکا لەعێراق بۆتە گەرموگوڕترین پرسى نێو گۆڕەپانى سیاسى و شەقامى عێراقى، هێزو لایەنە ساسییە شیعەکان بەرلە هەمووشیان موقتەدا سەدر وەک ئەوەى گرەنتیان لەبارەى جێبەجێکردنى ئەو بڕیارەى ئەمەریکا وەرگرتبێت پێشوازیان لەو هەنگاوە کرد، راستەخۆ دواى کۆبونەوەکەى جۆبایدن و مستەفا کازمى خۆشحاڵى خۆیان دەربڕى.

موقتەدا سەدر لە کاردانەوەى ئە وبڕیارەدا داواى کرد هێرشى سەر بنکەکانى ئەمەریکا لەعێراق رابگیرێت.

هاوپەیمانى فەتحیش کە باڵى سیاسى حەشدى شەعبیە، چونە دەرەوەى هێزە شەڕکەرەکانى ئەمەریکاى لە عێراق بە هەنگاوێکى ئەرێنى بە ئاراستەى گەڕانەوەى سەروەرى نیشتیمانى بۆ عێراق وێنا دەکات.

عەممارحەکیم، سەرۆکى رەوتى حیکمەى نیشتمانیش ئەو بڕیارەى وەک دەسکەوتێک بۆعێراقییەکان ناوبرد کە دەرئەنجامى یەکدەنگی و یەکریزى عێراقییەکان بووە لەبەرامبەر رەتکردنەوەى هێزى بیانى.

هێزە شیعەکانى عێراق ئەو بڕیارەى ئەمەریکا وەک سەرکەوتنێکى سیاسی بۆخۆیان وێنا دەکەن، چونکە  لەسەرەتاى ساڵى(2020)داو بە دیارى کراوى چەند رۆژێک دواى کوژرانى قاسم سولەیمانى و ئەبومەهدى موهەندیس، بەبێ کورد وسوننە توانیان یاساى دەرکردنى هێزەبیانییەکان لەعێراق تێپەڕێنن، كۆتایى هێنان بە ئەركى هێزە شەڕکەرکانى ئەمەریکا لە عێراق لە کۆتایى ئەمساڵدا وەک بەشێک لەجێبەجی کردنى ئەو یاسایە دەبینن، ئەمە جگە لەوەى کە ئەو هەنگاوەى ئەمەریکا لە بەرژەوەندى ئێرانى دۆستیانە.
پێدەچێت ئێرانیش هاوشێوەى هاوپەیمانە شیعەکانى لە عێراق خواستى ئەوەى هەبێت ئەو بڕیارەى ئەمەریکا جێبەجێبکرێت، ئەوەش لەسەر بنەماى ئەوەى راستەخۆ دواى راگەیاندنى ئەوبڕیارە، ئیسماعیل قائانى فەرماندەى فەیلەقى قودسى سوپاى پاسداران گەیشتە بەغدا.

بەوتەى سەرچاوەیەکى ئەمنی لە کۆبونەوەیەکیدا لەگەڵ ژمارەیەک لە فەرماندەکانى حەشدى شەعبى، قائانى داواى کردوە بۆردومانکردنى دامەزراوە بیناییەکان و بنکەکانى هاوپەیمانى نێودەوڵەتى رابگیرێت و لەبەرامبەردا فشارلە حکومەت و لایەنە سیاسییەکان بکرێت  فشاربکەن بۆپیکهینانى لیژنەیەکى تایبەت بەچاودێرى کردنى کشانەوەى هێزە شەڕکەرەکانى ئەمەریکا و رێککەوتنەکەى نێوان جۆبایدن و مستەفا کازمى.

ئەوخۆشحاڵیەى شیعەکان لەکاتێکدایە کە لەواقیعدا هێزەکانى ئەمەریکا لەعێراق ناکشێنەوە، تەنها ئەرکەکەیان دەگۆرێت، بۆیە بەدووریش نازانرێت ئەوهەنگاوەى ئەمەریکا تەنها قسەبێت و نەچێتە بوارى پراکتیکەوە بەمانایەکى دیکەى تاکتیکى سیاسى بێت.

ماڵپەرى ئەتلانتیک کانسڵ لە راپۆرتێکدا بە راوردکاریەکى لەنێوان ئەو جوڵەیەى ئەمەریکا لە عێراق و ئەفغانستان کردوە، لەوبارەیەوە ئاماژەى بەوەداوە، بەپێچەوانەى کشانەوەى هێزەکانى ئەمەریکا لە ئەفغانستان کە کشانەوەیەکى تەواوە، ئەوەى عێراق تەنها دروستکردنى هاوسەنگى و گۆڕینى هێزە شەڕکەرەکانە بۆ راهێنەرى سەربازى.

بەپێى ناوەرۆکى ئەو راپۆرتە، ئەوەى کە راگەیەنراوە تەنها فێڵێکى دیبلۆماسیە کە سودى بۆ ئیدارەکەى بایدن هەیە.

لە بەشێکى ئەو راپۆرتەى ئەتڵانتیکدا هاتوە، پێدەچێت هێزە تایبەتیەکانى ئەمەریکا لە عێراق بمێننەوە بۆ هەماهەنگى لەگەڵ سوپاى عێراق و لایەنە سیاسییەکان، ئەو پرۆسەیەش لە ژێرناوى راوێژکاریدا ئەنجام دەدرێت.

بەوپێەى کۆتا رۆژى ئەمساڵ وەک وادەى کۆتایى هێنان بە ئەرکى هێزە شەڕکەرەکانى ئەمەریکا لەعێراق دانراوە، لەساڵى داهاتودا وێنەکە روون دەبێتەوە، دەردەکەوێت کە سیاسەتمەدارە شیعەکان خوێندنەوەیەکى واقیعیان بۆدۆخەکە و بڕیارەکەى واشنتۆن کردوە، یاخود کەوتونەتە داوى فێڵە دیبلۆماسییەکەى ئەمەریکاوە

1658 جار خوێندراوەتەوە