لەدەستپێکى وەزرى نوێى یاسادانانى پەرلەمانى کوردستاندا، فراکسیۆنى گۆڕان داواى کاراترکردنى پەرلەمان دەکات، ئەولەیەتى کارەکانیشان لەم وەرزەى یاساداناندا ئاشکرا دەکات، هەروەها جەختیش لە پێویستى پەسەندکردنى پرۆژە یاساى بودجە و یاسای داواکاری گشتی و ئەنجومەنی دادوەری دەکاتەوە  ئەوەش لەپێناو سەروەربونی یاسا و پاراستنی مافی ئازادییە گشتیەکان، بەتایبەت ئازادیی ڕادەربەڕین، هەروەها داواى  دروستکردنى سندوقى کوردستان بۆ داهاتە نەوتییەکان و دامەزراندنى دەستەى دانوستانکارى نێوان هەرێم  وحکومەتى عێراق دەکات.

دەقى وتاری فراکسیۆنی گۆڕان بۆ دەستپێکی وەرزی بەھارەی ساڵی سێیەمی خولی پێنجەمی پەرلەمان

بەناوی خوای گەورە و میهرەبان
ئێمە لە فراکسێونی گۆڕان داوای کاراتر کردنی پەرلەمانی کوردستان دەکەین بە بەشداری سەرجەم فراکسیۆنە بەڕێزەکانی پەرلەمان لە پێناو نەخشەڕێگایەکی نیشتیمانی بۆ کاراکردنی ئەو یاسایانەی کە ڕۆڵیان ھەیە لە خۆشگوزەرانی و پەرەپێدانی ژیانی خەڵک وپرۆسەی سیاسی وەک ئەنجومەنی ڕاژە و یاسای بەدەستھێنانی زانیاری .
 لەسەر بنەمای  بەرنامەی هەڵبژاردن و کارنامەی فراکسیۆنی گۆڕان. ئەولەویەتی کارکردنمان بۆ ئەم وەرزەی یاسادانان بریتی دەبێت لە :

 

* چارەسەرو بەدواداچونی کێشەکانی خەڵکی کوردستان بەتایبەت مەسەلەی موچە و بژێوی خەڵکی کوردستان

 

* دەرچواندنی ئەو یاسایانەی کە دەبنە هۆی شەفافکردنی داهات و بە نیشتیمانی کردنی هێزە چەکدارەکان

 

*  بایەخدان بە کەرتەکانی پەروەردە و تەندروستی و وەبەرهێنان و بەگژداچونەوەی گەندەڵی.

 

* بە دامەزراوەکردنی پەیوەندیەکانی هەرێم.

 

* چاکسازی گشتگیرو هەمەلایەنە لەبواری (ئابوری، سەربازی ، یاسایی،کارگێڕی)

 

*پاراستنی فەرھەنگ و زمانی کوردی و فەراهەمکردنی مافی ئازادی ڕادەربڕین و سەروەری یاسا. لەم پێناوەدا لەم وەرزە نوێیەی کاری پەرلەماندا کاردەکەین بۆ پەسەند کردنی ئەم پڕۆژە یاسایانە:-

 

1 :- پەسەندکردنی پڕۆژەیاسای بودجە بەشێوازێک کە دەستەبەری شەفافیەت بکات لەداهاتی ناوخۆ و نەوت و خاڵە سنوریەکان، هەروەها چۆنیەتی خەرجیەکان و دەستەبەرکردنی موچەی موچەخۆران بەموچە نەدراوەکانیشەوە و کۆتایهێنان بە لێبڕینی موچە.

2 :- هەمواری یاسای خانەنشینی هێزەکانی ئاسایشی ناوخۆ و هەوڵدان بۆ یەکخستنەوە و بەدامەزراوەکردنی هێزە چەکدارەکان.

 

3 :- یاسای داواکاری گشتی و ئەنجومەنی دادوەری لەپێناو سەروەربونی یاسا و پاراستنی مافی ئازادییە گشتیەکان، بەتایبەت ئازادیی ڕادەربەڕین.

 

4 :- هەمواری یاسای وەبەرهێنان لە کوردستان بەمەبەستی سودمەندبونی خەڵکی کەم دەرامەت و بەگژداچونەوەی گەندەڵی و داگیرکاری کە لەم بوارەدا ڕێژەکەی زۆرە.

 

5 :- پڕکردنەوەی ئەو بۆشاییە یاساییانەی کە بۆ دەستە سەربەخۆکان ( مافی مرۆڤ ، کۆمسیۆنی باڵای هەڵبژاردنەکان، دیوانی چاودێری دارایی، دەستەی دەستپاکی) لە پێناو بەهێزکردنی ڕۆڵی چاودێری پەڕلەمان.

 

6 :- گوشار خستنە سەر حوکمەتی هەرێمی کوردستان بۆ دروستکردنی (سندوقی کوردستان بۆ داهاتە نەوتی و گازیەکان) لەپێناو جێبەجێکردنی یاساکانی پەڕلەمانی کوردستان  و شەفافیەت لە داهاتی نەوتدا.

 

7 :- دروستکردنی ( دەستەی دانوستانکار لەنێوان هەرێم و بەغداد) لە پێناو بەدامەزراوەیی کردنی گفتوگۆکان و مەرجەعی بونی پەڕلەمانی کوردستان وەک لە کارنامەی حوکمەت و ڕێککەوتنەکاندا هاتوە .

 

8-پەسەندکردنی یاسایەک بۆ پاراستنی بەرھەمە ناوخۆییەکان.

-لەکۆتاییدا داوا دەکەین پەڕلەمانی کوردستان هاوکات لەگەڵ دەرچواندن و پەسەندکردنی ئەم پڕۆژە یاسایانەدا ئەولەویەتی پەرلەمانی کوردستان ( نوسینەوەو پەسەندکردنی دەستور و هەمواری ئەو یاسایەنە  بێت کە هەڵگری ڕەهەندی نیشتیمانین).

210 جار خوێندراوەتەوە