دابان محەمەد: بە بەڵگە و دیکیۆمێنتەوە ئامادەین بۆ بەردەم دادگا

KNN : Kurdish News Network
08:07 - 13/01/2021
کوردستان

ئەندامێکى فراکسیۆنى گۆڕان لە پەرلەمانى کوردستان رایدەگەیەنێت؛ قەبارەى قاچاخچێتى و گەندەڵى و بەهەدەردان لە خاڵە سنورییەکان نزیک دەبێتەوە لە (200) ملیۆن دۆلار، دەشڵێت: ئەگەر داهاتەکان رێکبخرێنەوە کێشەى موچە بەشێوەیەکى باش چارەسەر دەبێت.

دواى ئەوەى بەرێوەبەرایەتی کۆمەڵگەی دەروازەی نێودەوڵەتی باشماخ سکاڵای لە دژی هەریەک لە پەرلەمانتاران (عەلی حەمەساڵح و دابان محەمەد) تۆمارکردووە و تۆمەتی ئەوەیان دراوەتە پاڵ، کە باسیان لەوە کردوە "چەندین بارهەڵگری قاچاخ بێ گومرگکردن هاوردەدەکرێت"، دابان محەمەد بە دیجیتاڵ میدیاى (KNN)ى راگەیاند: لە پەیڕەوى ناوخۆى پەرلەماندا ئەوە نەهاتووە کە پەرلەمانتار لەسەر نوسینى پۆستێک پارێزبەندى لەسەر هەڵبگیرێت، بەڵام ئێمە پارێزبەندى هەڵدەگرین و بە بەڵگە و دیکیۆمێنتەوە ئامادەى بەردەم دادگاین.

وتیشى: لەماوەى رابردودا خۆمان کۆى دۆسیەى خاڵە سنورییەکانمان داوە بە داواکارى گشتى و لە ماوەى شەش مانگى رابردوشدا هەوڵمانداوە دام و دەزگاى یاساى لەسەر کۆى کارى قاچاخچێتى ئەم وڵاتە بێدە دەنگ و چەند جاریکیش داواى دانیشتنى پەرلەمانمان کردوە .

ئاشکرایکرد، دەچینە بەردەم دادگا و ئەو بەڵگە و دیکیۆمێنت و زانیارییانەى لەبەردەستمانە بە ڤیدیۆ بە دەنگ بە هەموو شێوەیەک تەنانەت شاهێدمان هەیە و ئامادەن بێن بۆ دادگا شاهێدى بدات کە کارى قاچاخى هەیە و دەیان ملیۆن دۆلار بەهەدەر دەدرێ، بۆیە ئێمە هیچ لاریمان نیە و خۆمان داوامان کردوە بۆ هەڵگرتنى پارێزبەندى، بەڵام هیوادارم ئەوە نیەتێک نەبێت کە پەرلەمانتارى دیکەى پێ بترسێنرێت و لەسەر سکاڵایەکى بچوک پارێزبەندى لەسەر هەڵبگیرێ.

ئەو باسى لەوەشکرد، قاچاخچێتى تەنها لەیەک مەرز و دوان نیە، بەڵکو کۆى مەرزەکان تێوەگلاون لەو کارە و بەڵگە لەسەر کۆى مەرزەکان هەیە لە برایم خەلیلەوە تا پەروێزخان و بەڵگەکان وردن، لە دادگا ئامادەن کۆى بەڵگەکان بخەنەڕو بەوەى لە چ رؤژێک ئەنجام دراوە ئەو کەل و پەلە چى بوە کە هێنراوە یان رەوانە کراوە، ژمارەى ئۆتۆمبێل، تەنانەت ئەو شوێنانەشى لە ناو بازاڕ و بازاڕى دۆلارەکە و پێشەنگاى ئۆتۆمبێلەکان بە ئاشکرا نوسینگەى قاچاخچێتیان داناوە.

دابان محەمەد ئاماژەى بەوەشکرد، قەبارەى گەندەڵى و قاچاخچێتى و بەهەدەردان لە خاڵە سنورییەکان لە نێوان (150 بۆ 170) ملیۆن دۆلارە، بۆیە ئێستاش درەنگ نیە بۆ کۆنتڕۆڵکردنى خاڵە سنورییەکان و بەرزکردنەوەى داهات.

جەختیش دەکاتەوە، لە پێش کۆرۆنا داهاتى خاڵە سنورییەکان و داهاتى ناوخۆ نزیک بۆتەوە لە (380) ملیار دینار، ئەوەش لە داهاتى نەوت زیاتر بووە، کەواتا بە گێرانەوەى داهاتى خاڵە سنورییەکان و ناوخۆ و نەوت تا ڕادەیەکى زۆر کێشەى موچە چارەسەر دەبێت.

139 جار خوێندراوەتەوە