ئامادەکردنى / وریـا فەتاح
بڕیارە لە حوزەیرانى ئەمساڵ، عێراقییەکان بۆ هەڵبژاردنى پێشوەختە بچنە سەر
سندوقەکانى دەنگدان و لەو رێگەیەوە گۆڕانکارى ئەنجام بدەن و ناڕەزایەتیی و
گلەییەکانیان لە شەقامەوە بگوازنەوە بۆ ناو سندوقى دەنگدان.
جیاوازى هەڵبژاردنى ئەمجارە ئەوەیە کە هەڵبژاردنەکە بە یاسایەکى نوێى
هەڵبژاردن ئەنجام دەدرێت، کە ئەویش یاساى ژمارە (9)ى هەڵبژاردنى ئەنجومەنى
نوێنەرانى عێراقە.
هەرچەندە حکومەت بە سەرۆکایەتى مستەفا کازمى، لە هەوڵى بەردەوامدایە و
بەردەوام جەخت لە بەڕێوەچونى هەڵبژاردنەکە دەکاتەوە، بەڵام ئاڵنگارییەکانى بەردەم
پڕۆسەکە کەم نین و تائێستا بەشێکى زۆر لە چاودێران و لایەنە سیاسییەکانیش
پێیانوایە هەڵبژاردنەکە لە حوزەیرانى ئەمساڵ بەڕێوە ناچێت.
یاساى ژمارە (9)ى هەڵبژاردنى ئەنجومەنى نوێنەرانى عێراق
ئەم یاسایە دواى بێنە و بەردەیەکى زۆر دواجار لە ئەنجومەنى نوێنەران پەسەند
کرا، وەک شارەزایانى هەڵبژاردن باسى لێوەدەکەن یاساکە زادە و دەرهاویشتەى
خۆپیشاندانەکانى مانگی ئۆكتۆبەری (2019)ى گۆڕەپانى تەحریرەكانە، بە بەڵگەی ئەوەی كە
ئەگەر ئەو خۆپیشاندانانە بەو قەبارە گەورەیەو بەو پشوو درێژی و قوربانیدانە زۆرەوە
لە مەیدانەکانى تەحریر بەردەوام نەبوونایە؛ هەرگیز هەڵبژاردنەكانی عێراق یاسایەكی
لەمجۆرەی بەخۆیەوە نەدەدی.
ئارام جەمال، بەڕێوەبەرى پەیمانگەى کوردى بۆ هەڵبژاردن (K I E) پێیوایە، دەرچوونی ئەم یاسایە ئەو بۆچوونە
پشتڕاستدەكاتەوە كە دەڵێت: "لە پشت دێڕەكانی هەر یاسایەكی هەڵبژاردنەوە نەخشەى
سیاسی داهاتوی وڵات و دابەشكردنەوەی كورسییەكانی پەرلەمان بەسەر چین و توێژو تەمەن
و رەگەز و ئاستی خوێندن و پێكهاتەكانەوە دەبینرێت".
دەشڵێت: بەواتایەكی تر دەتوانین بڵێین كە یاسای
هەڵبژاردن ئەگەرچی لە روخساردا وەك پرسێكی هونەری و تەكنیكی بەرچاودەكەوێت بۆ رێكخستنی
قۆناغەكانی پڕۆسەی هەڵبژاردن، بەڵام لە جەوهەردا یاسای هەڵبژاردن پرسێكی تەواو سیاسییە
و بێلایەن نییە و بەپێی تەرازووی هێز مامەڵەی لەگەڵدا دەكرێت.
ئەوانەى پشتگیرى لە یاساکە دەکەن
لە عێراقدا ئەوانەی پشتگیری لەم یاسا نوێیە دەكەن و لەماوەی رابردودا هەوڵیان
بۆداوە بریتین لە هەریەك لە: (نەتەوەیەكگرتووەكان، ویلایەتە یەكگرتووەكانی ئەمریكا،
یەكێتی ئەوروپا، دامەزراوەی عەلی سیستانی، سەرۆكایەتی كۆمار و حكومەتی كازمی)ـە، هاوكات
ئەو حزبانەشی توانای ئاڕاستەكردنی دەنگدەرانی خۆیانیان هەیە و بڕوایان بە خۆیان هەیە؛
پشتگیریان لەو گۆڕانكارییانە كردوە كە لە یاساكەدا هەیە.
یاسای نوێی هەڵبژاردن، كە لە نۆ بەش و (50) ماددە پێكهاتووە، ئەم چەند گۆڕانكارییەی
تێدایە:
یەکەم/ ئەم یاسایە بازنەی هەڵبژاردنەكانی
بچوككردۆتەوە، واتا ئەگەر پێشتر هەر پارێزگایەكى عێراق بازنەیەكی هەڵبژاردن بووبێت
ئەوا ئێستا هەر پارێزگایەک دابەشبووە بەسەر چەند بازنەیەكی هەڵبژاردندا، واتا ئەم
یاسایە عێراقى لە (18) بازنەى هەڵبژاردنەوە فراوانکردوە بۆ (83) بازنە، بۆ نموونە:
ئەگەر لە هەڵبژاردنی پێشتردا پارێزگای سلێمانی بە (14) قەزا و (41) ناحیەكەیەوە یەك
بازنەی هەڵبژاردن بووبێت، ئەوا لەم یاسا نوێیەدا پارێزگای سلێمانی كراوەتە پێنج
بازنەی هەڵبژاردن، هەروەها پارێزگای هەولێریش كراوەتە (4) بازنە و دهۆكیش (3) بازنە
و كەركوك (3) بازنەی هەڵبژاردن.
دووەم/ لەم یاسا نوێیەدا خۆپاڵاوتن بە لیست نەماوە و لەبری ئەوە خۆپاڵاوتن
تاكە كەسییە، بەوەش یاساكە دەرفەت لەبەردەم خۆكاندیدكردن و دەرچوونی كاندیدی سەربەخۆی
تاكەكەسدا دەڕەخسێنێت، بە پێچەوانەی سیستمی هەڵبژاردنی پێشووتری ئەنجومەنی نوێنەرانی
عێراقەوە، كە لیستی نوێنەرایەتی رێژەیی بوو بە شێوازی (سانتلیگۆی هەمواركراوی عێراقی
1.7)، کە قورس بوو تاکەکەس دەربچێت.
لایەنی
نەرێنی یاساکە
1-
ھۆکاری ھێنانە پێشەوەی سیستمی (براوەی یەکەم) سیاسیە، ئەم سیستمە بۆ یەکەمجار بە مەبەستی
سیاسی لە ویلایەتی ماساتشوستسی ئەمریکا بۆ پەرتکردنی دەنگی ڕەشپێستەکان بەکارھات،
گومان ھەیە لە عێراقیش بەھەمان مەبەست بۆ پەرتکردنی دەنگی لایەنێک یان لێدان لە پێکھاتەیەک
ئەم سیستەمە جێگیر کرابێت.
2- لەژێر سایەی ئەم یاسایە دەنگێکی زۆر بەفیڕۆ دەڕوات،
بۆ نمونە: لە ھەڵبژاردنەکانی پێشوتر کاندید هەبوە بەتەنیا خۆی بەشى چوار کورسی دەنگى
کۆکردۆتەوە، ھادی عامری و حەیدەر عەبادی یەکی دوو کورسیان بەدەست دەھێنا، بەڵام
دوای جێبەجێکردنی ئەم یاسا تازەیە پاڵێوراو تەنیا دەتوانێت ھێندەی کورسیەکەی خۆی دەنگ
ببات و ھەموو دەنگە زیادەکانی تر بەفیڕۆ دەچێت.
3- بەھۆی ئەم یاسایەوە لەوانەیە کۆمەڵێک ھێزی
ناوچەیی و خێڵەکی بتوانن بگەنە پەرلەمان و کورسیەکی زۆر بەدەستبھێنن کە بەپێی بۆچوونی
چاودێران لەوانەیە نزیکەی (100) کورسی بێت، ئەمەش مەترسی جدی لەسەر پڕۆسەی دیموکراسی
و بەیەکەوەژیان دروست دەکات
4-
لایەنێکی نەرێنی تر کە ئەم یاسایە دروستی دەکات، بابەتى دروستبوونی گەورەترین کوتلەیە،
بەھۆی ئەوەی لەوانەیە کۆمەڵێک کەسی سەربەخۆ لە دەرەوەی حزبەکان بگەنە پەرلەمان و کۆکردنەوەی
ئەمانە لەناو کوتلەیەک و بەرنامەیەکی دیاریکراو ئەستەمە، بەتایبەت بۆ ئەو پرسانەی
پێویستان بە دەنگی دوو لەسەر سێی ئەندامانی پەرلەمانە، ئەوە
جگە لەوەى رەنگە ئەم بابەتە سەربکێشێت بۆ مامەڵەى ژێر بە ژێر.
5- لەبەرئەوەى یاساکە رێگە دەدات بە کەسى سەربەخۆ لە دەرەوەى حیزب و
کیانى سیاسى خۆى کاندید بکات، رەنگە ئەمە لە داهاتوودا سەربکێشێت بۆ ئەوەى ئەو
نوێنەرە هیچ لێپرسراوێتییەکى بەرامبەر دەنگدەر نەبێت، چونکە لە هیچ حیزب و
لایەنێکى سیاسییەوە نەهاتوە تا حیزبەکەى لێى بپرسێتەوە یان دەنگدەر ئەوەى لەبەردەم
بێت کە بە شێوەیەک لە شێوەکان سزاى حیزبەکەى بدات.
6- لەبەرئەوەى یەکەمجارە دەنگدەر بەو شێوازە نوێیە دەنگ دەدات و تەنها
مافى ئەوەى هەیە دەنگ بدات بەو کاندیدەى لە چوارچێوەى بازنەکەى خۆى کاندید کردوە،
ئەگەر هەیە جۆرێک لە سەرلێشێوان بۆ دەنگدەر دروست بکات.
لایەنە ئەرێنییەکان یاساکە
1- گێڕانەوەى دادپەروەرى جوگرافى لە نوێنەرایەتیدا، بەشێوەیەک ئەگەر
لە خولەکانى پێشوتردا زۆرێک لە ناوچە و پارێزگاکان نوێنەریان نەبوبێت لە ناو ئەنجومەنى
نوێنەران، ئەوا ئەو یاسایە لە رێگەى بچوکردنەوەى بازنەکانى هەڵبژاردن دادپەروەرى
دەگەڕێنێتەوە بۆ هەموو ناوچەکان تا بەپێى قەبارەى خۆیان نوێنەریان هەبێت لە ناو
پەرلەمان.
2- دەنگدەر و نوێنەر سەر بەیەک بازنەى هەڵبژاردنن، واتا دەنگدەران
تەنها دەتوانن لە چوارچێوەى بازنەى جوگرافى خۆیان دەنگ بدەن بە نوێنەرى خۆیان،
کاندیدەکەش مەرجە خەڵکى ئەو بازنەیە بێت کە خۆى تێدا هەڵدەبژێرێت، ئەوەش وا دەکات
کاندید و دەنگدەر لە روى جوگرافى و کۆمەڵایەتییەوە لەیەکترى نزیک ببن.
3- کۆتایى هێنان بە (رەمز)ى هەڵبژاردن، لە هەڵبژاردنەکانى پێشوتردا
ئەگەر لە ناو لایەنە سیاسییەکان کاندیدێک رەمز بوبێت و بەهۆى دەنگەکانى ئەوەوە
چەند کاندیدێکى دیکە دەرچوبن، ئەوا ئەو یاسایە کۆتایى بەمە هێناوە، چونکە هەر
کاندیدێک دەتوانێت دەنگ بۆ دەرچونى خۆى کۆبکاتەوە و دەنگە زیادەکانى ناچێتەوە بۆ
هیچ کاندیدێکى دیکە و دەسوتێت.
4- کاندیدى دەرچوو مەرجە دەبێت بچێتە پەرلەمان و لە ئەگەرى کشانەوەى
ئەو کاندیدە جێگەى دەگرێتەوە کە لە بازنەى هەڵبژاردنەکە دەنگى پێویستى هێناوە، جا
لە هەر لایەنێک بێت.
5- لایەنێکى دیکەى ئەرێنى ئەو یاسایە ئەوەیە حزبەکان ناتوانن بەیەک
پاکێچى بانگەشەوە بچنە هەڵبژاردنەوە، بەڵکو دەبێت بە لەبەرچاوگرتنى جوگرافیا و
بارى کۆمەڵایەتى هەر ناوچەیەک بەرنامە دابڕێژن.
6- جاران ئەگەر لەناو حیزب ئەو کاندیدانە دەربچونایە کە لە سەرۆک و
مەکتەب سیاسییەکانەوە نزیکبون، ئەوا ئەم یاسایە کۆتایى بەوە هێناوە و لەم
هەڵبژاردنەدا حیزب ناچارە ئەو کەسانە کاندید بکات کە لێهاتون و جێگاى خواستى
خەڵکن.
هەرێمى کوردستان لە فرە بازنەیدا
هەرێمى کوردستان کە لە هەرسێ پارێزگاى هەولێر و سلێمانى و دهۆک لە یاساکەدا
ناوى هاتوە، دابەشکراوە بەسەر (12) بازنەى هەڵبژاردن.
دەستەى ئامارى هەرێمى کوردستان، نەخشەى پێشبینیکراوى ژمارەى دانیشتوانى هەرێمى
کوردستانى بۆ ساڵى (2020) بڵاوکردەوە و تێیدا دەردەکەوێت ژمارەى دانیشتوانى هەرێم
بریتییە لە شەش ملیۆن و (171) هەزار و (83) کەس، لەو ژمارەیەش دوو ملیۆن و (254) هەزار
و (422) کەس دانیشتوى هەولێرى پایتەختە و ژمارەى دانیشتوانى سلێمانى بریتییە لە
دوو ملیۆن و (152) هەزار و (595) کەس و پلەى دوەمى گرتوە، لە پلەى سێسەمیش پارێزگاى
دهۆک دێت بە یەک ملیۆن و (648) هەزار و (611) کەس، ژمارەى دانیشتوانى پارێزگاى هەڵەبجەش
پێکهاتوە لە (115) هەزار و (455) کەس.
دیزاینى بازنەکانى هەڵبژاردن لە پارێزگاکانى هەرێم
یەکەم/ پارێزگاى هەولێر کە ژمارەى دانیشتوانى دوو
ملیۆن و (254) هەزار و (422) کەسە، (15) کورسى هەیە و پێکهتاتوە لە (4) بازنەى
هەڵبژاردن بەم شێوەیە:
بازنەى یەکەم، رۆژهەڵاتى هەولێر (٤) کورسى یەک کۆتاى ئافرەتان.
بازنەى دوەم، خۆرئاواى قەزاى هەولێر (3) کورسى یەک کۆتاى ئافرەتان.
بازنەى سێیەم، (سۆران ـ مێرگەسور، رەواندز، شەقڵاوە، چۆمان)، (4) کورسى یەک
کۆتاى ئافرەتان.
بازنەى چوارەم، (کۆیە، دەشتى هەولێر، خەبات)، (4) کورسى یەک کۆتاى ئافرەتان.
دووەم/ پارێزگاى سلێمانى و هەڵەبجە بەیەکەوە ژمارەى دانیشتوانیان دوو ملیۆن
و (268)هەزار و (50) کەسە، (18) کورسى هەیە و پێکهاتوە لە (5) بازنەى هەڵبژاردن
بەم شێوەیە:
بازنەى یەکەم/ (باکورى سلێمانى، ماوەت، شارباژێر)، (4) کورسى هەڵبژاردن (1)
کورسى کۆتایى ئافرەتان.
بازنەى دووەم/ (باشورى سلێمانى، قەرەداغ)، (3) کورسى هەڵبژاردن، (1) کورسى
کۆتای ئافرەتان.
بازنەى سێیەم/ (چەمچەماڵ، کەلار، کفرى، دەربەندیخان)، (4) کورسى هەڵبژاردن،
(1) کورسى کۆتای ژنان.
بازنەى چوارەم/ (پشدەر، رانیە، دوکان)، (4) کورسى هەڵبژاردن، (1) کورسى
کۆتاى ژنان.
بازنەى پێنجەم/ (هەڵەبجە، پێنجوێن، سەیدسادق، شارەزور)، (3) کورسى
هەڵبژاردن، (1) کۆتاى ژنان.
سێیەم/ پارێزگاى دهۆک کە ژمارەى دانیشتوانى یەک ملیۆن و (648) هەزار و
(611) کەسە، (11) کورسى هەیە و پێکهاتوە لە (3) بازنەى هەڵبژاردن، بەم شێوەیە:
بازنەى یەکەم/ (ناوەندى دهۆک، ئامێدى)، (4) کورسى هەڵبژاردن، (1) کورسى
کۆتای ژنان.
بازنەى دووەم/ (زاخۆ، سێمێل)،(3) کورسى هەڵبژاردن، (1) کورسى کۆتای
ئافرەتان.
بازنەى سێیەم/ (ئاکرێ، شێخان، بەردەڕەش)،(4) کورسى هەڵبژاردن، (1) کورسى
کۆتاى ژنان.
ئایا لە حوزەیرانى داهاتوو هەڵبژاردن بەڕێوە دەچێت؟
هەرچەندە حکومەت و مستەفا کازمى بەردەوام لە لێدوانەکانیاندا جەخت لە
بەڕێوەچونى هەڵبژاردنى پێشوەختە دەکەنەوە لە حوزەیرانى ئەمساڵدا، بەڵام کۆمەڵێ ئاڵنگارى
لەبەردەم هەڵبژاردنەکەن، ئەگەر بێت و لەو ماوەیەدا ئەو ئاڵنگاریانە تێنەپەڕێندرێت
ئەوا ئەگەرى بەهێز ئەوەیە هەڵبژاردنەکە دوابخرێت.
ئاڵنگاریەکانى بەردەم یاساى نوێى هەڵبژاردن
سێ ئاڵنگارى بەهێز لە بەردەم یاساى نوێى هەڵبژاردنە، ئەو سێ ئاڵنگارییە
راستەوخۆ دێتەوە بەردەم هەڵبژاردنى پێشوەختە بەم شێوەیە:
یەکەم: دادگای فیدراڵی، لەئێستادا دادگاکە لەکارکەوتووە، دوو پڕۆژە یاسا لە
پەرلەمانە بۆ کاراکردنەوەی دادگاکە، بەبێ کاراکردنەوەی دادگاکە ھەڵبژاردن بەڕێوە
ناچێت.
دووەم: کۆمسیۆنی باڵای ھەڵبژاردنەکان، لە رووی پێکھاتە و ستراکچەرەوە نوێیە
و ھێڵە گشتییەکانی کارکردنی روون نیە، بەو پێیەی زۆرینەی ئەندامانی نوێن و لە دادوەران
پێکھاتوون.
سێیەم: ھەڵوەشاندنەوەی پەرلەمان، پێویستە پێش ھەڵبژاردنی پێشوەخت پەرلەمان
خۆی ھەڵبوەشێنێتەوە، ئەمەش لە ھەموو حاڵەتەکاندا پێویستی بە دەنگی زۆرینەی رەھای ئەندامانی
پەرلەمان ھەیە.
یاساى نوێى هەڵبژاردن، ئاشتکردنەوەى دەنگدەران بە
سندوقەکانى دەنگدان
لە هەڵبژاردنەکانى رابردوى عێراق و هەرێمدا، بەهۆى ئەوەى بە یاسایەک
بەڕێوەچون بەردەوام لە خزمەت هێزە دەسەڵاتدارەکاندابووە، ئەمە وێنەیەکى لە هزرى
دەنگدەراندا دروستکردوە کە هەرچیەک بکەن ناتوانن لە رێگەى دەنگەوە هێزە پاوانخواز
و نەریتخوازەکان تێپەڕێنرێت، بەڵام ئەو یاسا نوێیەى هەڵبژاردن لەبەرئەوەى لە
منداڵدانى خۆپیشاندانەکانى ئۆکتۆبەرى (2019)ى عێراقەوە لەدایکبوە، نزیکایەتییەکى
زۆرى لەگەڵ دەنگدەر هەیە و دەرفەتى ئەوەى تێدایە چیتر رێگرى بکات لەوەى ئەو هێزانە
بتوانن پاوانخوازى بکەن و هەڵبژاردن لەبەرژەوەندى خۆیان یەکلایى بکەنەوە.
پ. ی. د. هێمن عەبدوڵا، مامۆستاى زانکۆ و دکتۆرا لە تاوانەکانى هەڵبژاردن،
لەبارەى گرنگى هەڵبژاردن و ئەو دەرفەتانەى یاساى نوێى هەڵبژاردن هەڵیگرتون، بە
دیجیتاڵ میدیاى (KNN)ى وت: "ئەگەر هەڵبژاردن نەکەینە نەریت و کلتوور هەموومان
دۆڕاوین و هیچ ئامڕازێکی نەرم لەئارادا نابێت بۆ بنیاتنانی دونیایەکی باشتر و
جوانتر، رەنگە لەقۆناغەکانی رابردوودا کە هەڵبژاردنەکان پاک و بێگەرد نەبوون دەرئەنجامە
باشەکانی ئەم پڕۆسەیە نەبینرابێت و ماندوو بوبین و پێمانوابێت ئەم ئامرازە ناتوانێت
گۆڕانێکی ئەوتۆ (کاڵا بە باڵای ئومێدەکان) بهێنێتە ئارا، رەنگە بەشێک لەڕاستی لەم دونیا بینیە نەفەس کورتەشدا
هەبێت، بەڵام نابێت ئەو راستییە نادیدە بگرین کە گۆڕانکاری سیاسی و دروستکردنی نەوەی
سیاسی نوێ بەمیکانیزمی نەرم و بەجێهێشتنی دونیابینی جەنگاوەرەکان و پێداگری و نەفەس
درێژی دێتەدی.
ئەو پێیوایە؛ هەڵەیەکی
کوشندەیە هێزەکانی ئۆپۆزسیۆن و خەڵکانی ناڕازی و ئەوانەی خەون بە دونیایەکی جوانترەوە
دەبینن دەستبەرداری ئەم میکانیزمە نەرمەی گۆڕانکاری ببن و بەشێک بن لە پڕۆسەی بێ بەهاکردنی
هەڵبژاردن.
دەشڵێت: حەق وایە لایەنگرانی بێبەهاکردنی هەڵبژاردن لەخۆیان بپرسن گەر دەستبەرداری
ئەم ئامرازە ببین، ئاڵتەرناتیڤ چییە؟، ئایا رازی بین بەوەی لەدەرەوەی ویستی ئێمە روودەدات؟،
یان دەست بدەینە شۆڕش و خوێنێکی تر ؟!، ئایا
هەریەک لەم دوو بژاردەیە دەمانگەیەنن بەکوێ؟.
لەبارەى ئەنجامدانى هەڵبژاردنى پێشوەختەش بە یاساى نوێى هەڵبژاردن، هێمن
عەبدوڵا باسى لەوەکرد، یاسای نوێی هەڵبژاردنی
ئەنجومەنی نوێنەران زادەی ئەم تێڕوانینە نوێیەی خۆپیشاندەرانی گۆڕەپانی (تحریر)ـە
کە چاودەبڕێتە پاراستنی قەوارەی دەوڵەت و ڕەتکردنەوەی گەندەڵی و بەحزبی کردنی دامەزراوەکانی
حکومڕانی و دابەشکردنی مەزهەبی کۆمەڵگا و چاودەبڕێتە دۆزینەوەی میکانیزمێک بۆ تێپەڕاندنی
حیزب و مەزهەب و بەسەنتەرکردنی هاوڵاتیان و هاونیشتمانیان، وێڕای کەموکورتی و تێبینی و سەرنجەکان لەسەر
یاساکە، گەر هەوڵەکانی حکومەتە کاربەڕێکەرەکەی کازمی بۆ جێبەجێکردنی ئەم یاسایە و
ئەنجامدانی هەڵبژاردنێکی پێشوەختەی پاک و بێگەرد سەربگرێت و بتوانێت ئاڵنگارییەکانی
بەردەم پڕۆسەکە تێپەڕێنێت، دەرفەتێکی نوێ دەڕەخسێنێت بۆ هێنانەکایەی گۆڕانکارییەکی
نەرم لە پەرلەمانی ئایندەی عێراق و لەدایکبوونی حکومەتێکی خەڵک سالاری لێدەکەوێتەوە.
هەر لە بارەى ئومێد بە هەڵبژاردن بە یاساى نوێیەکە، ئارام جەمال بەڕێوەبەرى
پەیمانگاى کوردى بۆ هەڵبژاردن لە نوسینێکدا دەڵێت: خۆپیشاندەرە دیارەکانى مەیدانى
تەحریر لە ترسى کوشتن ناوێرن بچنەوە ماڵەکانیان، لەولاشەوە دەیانەوێت لە
هەڵبژاردنى داهاتوودا کێبرکێ لەگەڵ بکوژە چەکبەدەستەکانیان بکەن و لە رێگەى
پەرلەمانەوە بڕۆنەوە بۆ ماڵ.
دەرگاى خۆتۆمارکردن بۆ هەڵبژاردن
کۆمیسۆنى باڵاى هەڵبژاردنەکانى عێراق، لە رۆژى شەممە، (9/1/2020) دەرگاى
خۆتۆمارکردنى حیزب و هاوپەیمانێتییەکانى بۆ هەڵبژاردنى پێشوەختە کردەوە تا رۆژى
(16/1/2021) بەردەوام دەبێت، لە رۆژى (16/1 تا 28/1) دەرگاى خۆتۆمارکردنیش بۆ
کەسایەتییە سەربەخۆکان کراوە دەبێت.
هەڵاوسانى حیزبەکان
ئارام جەمال، بەڕێوەبەرى پەیمانگەى کوردى بۆ هەڵبژاردن رایدەگەیەنێت؛ بەرەو
ئەوە دەچین ژمارەی حیزبە تۆمارکراوەکان هەتا کاتی هەڵبژاردنی پێشوەختەی داهاتوو
بگاتە ژمارەی کورسییەکانی پەرلەمانی عێراق (329 کورسی).
رونى دەکاتەوە، ئەگەر ژمارەی ئەوانەی مافی دەنگدانیان هەیە (26) ملیۆن و (500)
هەزار کەس بێت، کەواتە هەر حزبێک نزیکەی (80) هەزار دەنگدەری بەردەکەوێت، ئەمەش لە
دنیادا بێوێنەیە و نیشانەی هەڵاوسانی ژمارەی حزبەکانە نەک فرەیی حزبی.
هەڵاوسانەکە بەم شێوەیەیە:
کۆى گشتى ئەو حیزبانەى خوازیارى مۆڵەت وەرگرتنن ژمارەیان (424)ە.
ئەو حیزبانەى مۆڵەتیان وەرگرتوە (231) حیزبە.
ئەو حیزبانەى لە قۆناغى دامەزراندندان (79) حیزبن.
ئەو حیزبانەى داواى تۆمارکردنیان رەتکراوەتەوە ژمارەیان (99) حیزبە.
ئەو حیزبانەى داواى تۆمارکردنیان کشاندۆتەوە ژمارەیان (15) حیزبە.
1811 جار خوێندراوەتەوە