رۆژی لێبوردەییە، با لێبوردەبین

KNN : Kurdish News Network
10:18 - 16/11/2020
هەمەڕەنگ

ئەمڕۆ رۆژی لێبوردەییە، پرسیار پێشەکى ئەوەیە ئێمە تاچەند لێبوردەبوین بۆ بەرامبەرەكەمان؟

لێبوردن یەكێكە لەو چەمكانەی لەناو كۆمەڵگە و ئاین و لایەنە جیاوازەكانی دیكەی ژیاندا بەشێوەكی فراوان بەكارهاتووە‌ و باسكراوە، مەبەست لێی لەبیركردنی هەڵەی كەسێك و وازهێنانە لە تۆڵەكردنەوە بەرامبەر بە بابەتێكی دیاریكراو، ئەوەش بە یەكێك لە رەوشتە جوانەكانی مرۆڤ دادەنرێت.

رێكخراوی نەتەوە یەكگرتووەكان (16) تشرینی دووەمی هەموو ساڵێكی وەك رۆژی جیهانی لێبوردەیی دیاریكردووە و لەو رۆژەدا چەندین چالاكی جۆراوجۆر لە وڵاتانی جیهان ئەنجام دەدرێن بۆ بڵاوكردنەوەی خۆشەویستی و رێزگرتنی زیاتر لەنێوان تاكەكاندا بۆ ئەوەی هەمووان ژیانێكی ئاسودەیان هەبێت.

بیرۆكەی دیاریكردنی رۆژەكە دەگەڕێتەوە بۆ ساڵی (1993) كاتێك رێكخراوی نەتەوە یەكگرتووەكان بڕیاریدا ساڵی (1995) وەك ساڵی نێودەوڵەتی لێبوردن دیاری بكات، دواتریش لە كۆبونەوەیەكی رێكخراوی یونسكۆدا كە (16 تشرینی دووەمی 1995) بەسترا، بڕیاردرا ساڵانە لەو رێكەوتەدا یادی رۆژی لێبوردەیی بكرێتەوە.

توێژەران و شارەزایانی كۆمەڵایەتی ئاماژە بەوە دەكەن، ئەو كەسانەی لێبوردەن هەمیشە خاوەنی ناو و ناوبانگێكی باشن و رێزێكی تایبەتیان لێدەگیرێت هەروەها لە كۆڕ و كۆبونەوەكاندا گرنگی بە بەشداری كردن و وەرگرتنی راو بیرو بۆچونیان دەدرێت.

بەپێی ئەنجامی ئەو توێژینەوانەی لەسەر ئەو تایبەتمەندییەی مرۆڤ ئەنجامدراون، دەركەوتووە، لێبوردەیی لە رووەكانی كۆمەڵایەتی و دەرونی و تەندروستی و چەند لایەنێكی دیكەوە سودی بۆ مرۆڤ هەیە، وادەكات هەستی هاوكاری و تێگەیشتن و سۆز لەگەڵ بەرامبەر و دەوروبەردا زیاتر بێت.

لێبوردەیی پەیوەندییەكی راستەوخۆی بەتەندروستی لەشی مرۆڤەوە هەیە، بەجۆرێك پسپۆڕانی تەندروستی سەلماندویانە ئەو كەسانەی لێبوردەن بەرامبەر كەسانی دەوروبەریان ‌و هەڵەكانیان لەبیر دەكەن، ئەگەری توشبوونیان بە چەند نەخۆشییەكی جیاواز كەمدەبێتەوە، بە تایبەت فشاری خوێن و نەخۆشییەكانی دڵ، هەروەها بەرگری لەشیان بەهێزترە و تەمەن درێژترن.

لە روی كۆمەڵایەتییەوە لێبوردەیی دەبێتە هۆی دروستكردنی كۆمەڵگایەكی ئارام و خۆشگوزەران و پێشكەوتوو لە چەندین روەوە و تاكەكانی زیاتر هاوكاری یەكتر دەكەن لەكارە جیاوازەكاندا، هەروەها پەیوەندی كۆمەڵایەتی نێوان تاكەكانی خودی كۆمەڵگایەك هەروەها لەگەڵ كۆمەڵگەكانی دیكەش بەهێزتر دەكات، هاوكات لە روی دەرونییەوە هەستی دڵخۆشی و ئارامی بە مرۆڤ دەبەخشێت و رێگری لە خەمۆكی و دروستبونی دڵەڕاوكێ دەكات و توانای داهێنانی تاك فراوان دەكات.

کەواتا با ئەم رۆژە ببێتە هۆکارێک بۆ ئەوەى لێبوردەبین و بەرامبەرەکەمان ببەخشین لەو هەڵە و کەموکورتییانەى بەرامبەرمان ئەنجامیداوە.


141 جار خوێندراوەتەوە