حکومەتى ویفاقى لیبیا بە سەرۆکایەتى فایزسەراج کۆنترۆڵکردنەوەى تەواوى سنورەکانى تەرابلوسى راگەیاند و ئەردۆغان بەڵێنى هاوکاری زیاترى بە سەراج لە دژى خەلیفە حەفتەر داوە.

 میدیا نێوخۆییەکان لیبیا بڵاویانکردەوە، ئەمڕۆ هەینى دانیشتوانى تەرابلوسى پایتەختى لیبیا بۆ دەربڕینى پشتیوانیکردنى حکومەتەکەى سەراج و بە بۆنەى کۆنتڕۆڵکردنەوەى تەواوى شارەکە لە دەست چەکدارەکانى خەلیفە حەفتەر، رژاونەتە سەر شەقامەکان و ئاهەنگیان گێڕاوە.

سوپاى لیبیا سەرکەوتنى بەسەر هێزەکانى حەفتەردا راگەیاند و ئاماژەى بەوەکردووە، لە دواى نزیکەى (14) مانگ لە هێرشى هێزەکانى حەفتەر بۆسەر تەرابلوسى پایتەخت و کۆنتڕۆڵکردنى بەشێکى زۆر لە شارەکە لەلایەن ئەو هێزانەوە، دوێنێ سوپاى فەرمى حکومەتى ویفاقى لیبیا کە لەژێر فەرمانى فایز سەراجى سەرۆکوەزیراندایە، توانیویانە هێزەکانى حەفتەر لە سنورى پایتەخت بکەنە دەرەوە و تەواوى شارەکە کۆنترۆڵ بکەنەوە.

لاى خۆشیەوە فایز مستەفا سەراج کە لە (8/10/2015) وە بە رێکەوتنێکى سیاسى نێوان لایەنەکانى لیبیا بووەتە سەرۆکى حکومەتى ئەو وڵاتە رایگەیاند، لە دواین کۆبونەوەیدا لەگەڵ رەجەب تەیب ئەردۆغانى سەرۆککۆمارى تورکیا، ئەردۆغان بەڵێنى پێداوە هەتا سەرکەوتنى تەواوەتى حکومەتى لیبیا و کۆتایهێنان بە چەکدارانى حەفتەر ئەنقەرە هاوکار و پشتیوانى سەراج و حکومەتەکەى بێت.

هەرچى هێزەکانى حەفتەریشە هەرەشەى دووبارە هێرشکردنە سەر تەرابلوسى پایتەخت دەکەن و ئەحمەد مسمارى وتەبێژى هێزەکانى خەلیفە حەفتەر رایگەیاند، هێزەکانیان لە دەرەوەى سنورى تەرابلوس جێگیر کردووە و لە ئێستادا رێککەوتنى ئاگربەست لە نێوان ئەوان و سوپاى لیبیادا هەیە، ئەگەر حکومەتى لیبیا پابەند نەبێت بەو ئاگربەستەوە ئەوا ئامادەن جارێکى دیکە هێرشى سەربازى بکەنەوە بۆسەر تەرابلوسى پایتە ختى لیبیا.