حەوت نیشانەى کۆرۆنا لە زارى توشبووەکانەوە

04:01 - 23/03/2020
تەندروستی

چەند مانگێكە بڵاوبونەوەی ڤایرۆسی كۆرۆنا بووەتە باسی گەرمی ڕۆژ لە وڵاتانی دونیا و سات لەدوای سات زانیاری و هەواڵی نوێ لەبارەی ژمارەی توشبووان و مردن و چاكبونەوە و نیشانەكانی‌ توشبون بە ڤایرۆسەکە و هەوڵەكانی دۆزینەوەی چارەسەر بڵاودەكرێتەوە.

ڕێكخراوی تەندروستی جیهانی و ناوەندە تەندروستییەكانی دیكە چەندین ڕێنماییان لەبارەی نەخۆشییەكەوە بڵاوكردوەتەوە، زۆرینەشیان ئاماژەیان بە دیارترین نیشانەكانی كردووە، كە تاڕادەیەك لە پەتا وەرزییەكان دەچێت، بەڵام بەشێوەیەكی قورستر.

ئەو كەسانەش كە توشی نەخۆشییەكە بوون و دواتر چاكبونەتەوە، باس لە چەند نیشانەیەك دەكەن كە ڕەنگە لە میدیاكانەوە باس نەكرابێت.

لەگرنگترین نیشانەکان:

1-ئازاری جیوبەكانی لوت:
ئەوانەی توشی نەخۆشی كۆڤید 19 دەبن، ئازارێكی زۆری جیوبەكانیان هەیە، توشی ئاوسان و هەوكردن دەبێت، لەگەڵ هەڵامەت و ئەنفلۆنزا، ئازارەكە بەجۆرێكە دەگاتە شەویلگەی سەرەوە و نێوانی چاوەكان.

یەكێك لە چاكبووەوەكان دەڵێت "تەنانەت دوای نەمانی هەوكردنی سییەكانیش ئازاری جیوب دەبێت و دوای چەند ڕۆژێك كەسەكە هەست بە باشی دەكات".

2-فشاری گوێیەكان:
یەكێك لە نیشانە دیارەكانی كۆرۆنا دروستبونی فشارێكی زۆرە لەسەر گوێیەكان، كەسەكە هەست دەكات گوێیەكانی ئامادەیە بۆ تەقینەوە، ئەوەش بەهۆی گیرانی بۆرییەكانی گوێ و ئەو گۆڕانكارییانەی ڤایرۆسەكە لە سیستمی لەشدا دروستی دەكات، هەروەها كەسەكە كێشەی لە گوێی ناوەڕاست و كەناڵی گوێدا بۆ دروست دەبێت و كاریگەریی لەسەر هەستی بیستن هەیە.

3-سەرئێشەی توند:
ئەوانەی توشی كۆرۆنا دەبن سەرئێشەیەكی بەهێزیان هەیە، بەڵام مەرج نییە هەموو ئەوانەی توشی سەرئێشە دەبن نیشانەی توشبوونیان بێت بە ڤایرۆسەكە، بۆیە باشترە لەگەڵ هەستكردن بەو حاڵەتە ئاو بخورێتەوە و كەمێك پشوو وەربگیرێت، لەگەڵ كەمكردنەوەی بەكارهێنانی ئامێرە ئەلكترۆنییەكان.

4-سوتانەوەی چاو:
كەسی توشبوو هەست بە سوتانەوەی چاو و خورانی دەكات هاوشێوەی ئەوەی هەستیاریی هەبێت، ئەوەی ئەم سوتانەوەو خورانەش جیادەكاتەوە لەوەی كەسێك لەناو تەپوتۆز و دوكەڵدا توشی دەبێت، ئەوەیە بێ بونی هیچ هۆكارێك و لە كەسێكی ئاساییدا ئەو هەستەی بۆ دروست دەبێت.

5-هاتنەوە یەكی قورگ:
بەهۆی كۆرۆناوە لەوزەتێنەكان توشی ئاوسان و هەوكردن دەبن و نەخۆش كۆكەیەكی بەردەوام و بەڵغەمی دەبێت، فشارێكی زۆر لەخۆی دەكات بۆ ئەوەی هەناسە بدات.


6-ئازار لە هەموو شوێنێكی جەستە:
توشبووانی كۆرۆنا دەڵێن "ئازارەكان تەنها لە قوڕگ و لوت و گوێدا نییە، بەڵكو شان و قاچ و سنگیش ئازارێكی زۆری هەیە".

7-سییەكان وەك دوو كیسی كاغەزیان لێدێت:
لەكاتی هەناسەداندا هەست دەكرێت سییەكان بەرزدەبنەوە، بەهۆی هەوكردنەوە كیسی هەوای سییەكان بچوك دەبنەوەو پڕ دەبن لە شلەمەنی ‌و بۆرییەكانی هەوا دەگیرێن، ئەوەش كێشە بۆ كرداری هەناسەدان دروست دەكات.

19578 جار خوێندراوەتەوە