کەمال کڵچدارئۆغڵو رایگەیاند، دەمیرتاشتان خۆشبوێت یان نا، ئەو با ناحەق لە زینداندایە.

سەرۆکی پارتی گەلی کۆماری کە گەورەترین پارتی ئۆپۆزسیۆنی تورکیایە لە کۆبوونەوەی گروپی پارتەکەیدا وتی، سەڵاحەدین دەمیرتاش بێتاوانە و بەهۆی وەستانەوە لە دژی ئەردۆغان لە زینداندایە چونکە بە ئەردۆغانی وتبوو "ناتکەین بە سەرۆک".

کڵچدارئۆغڵو رەخنەشی لە دادگا و دەوڵەتی تورکیا گرت و ئاماژەی بەوەکرد، هەر کاتێک دەمیرتاش لە دۆسیەیەک بێتاوان دەردەچێت، خێرا دۆسیەیەکی دیکەی بۆ دەکەنەوە، بۆچی؟ تەنها لەبەرئەوەی لە زینداندا بمێنێتەوە و ئازاد نەکرێت.

دەربارەی نەخۆشکەوتنی دەمیرتاشیش باسی لەوە کرد، دەمیرتاش نەخۆشکەوتووە، بەڵام درەنگ بردوویانە بۆ نەخۆشخانە. "هیوای شیفای بۆ دەخوازم."