کەمی کارەبا لە سلێمانی ئەنجوومەنی پارێزگای ئەو شارە کۆدەکاتەوە

04:35 - 03/12/2019
کوردستان

ئەنجوومەنی پاریزگای سلێمانی لەسەر کەمی بڕی کارەبای نیشتمانی بە هاوڵاتیان کۆدەبێتەوە و تاوتوێی ئەو ڕاوێژ و بڕیارانە دەکات کە وەک پێویست سەبارەت بە کارەبای سلێمانی جێبەجێ نەکراون.

 

لەسەر ئەو پرسە ئازاد حەمەئەمین سەرۆکی ئەنجوومەنی پارێزگای سلێمانی ڕایگەیاندووە " لە ماوەکانی رابردوودا پارێزگاری سلێمانی و بەڕێوبەری گشتی کارەبای سلێمانی لە هەولێر کۆبوونەوەیەکیان ئەنجامدابوو، بەمەبەستی باشترکردنی کارەبای سلێمانی، بەڵام تا ئێستا ئەو راوێژ و بڕیارانەی کە درابوون وەکو پێویست نەچۆتە بواری جێبەجێکردنەوە، هەر بۆیە کارەبای سلێمانی تا ئەمساتەش هەر خراپە".

وتوشیەتی " یەکی کانوونی یەکەم لەگەڵ جێگری وەزیری کارەبا کۆبووینەوە لەسەر رەوشی کارەبای سلێمانی، بڕیاریشە ئەمڕۆ یان سبەی بۆ قسەکردن لەسەر سیستەمی پێدانی کارەبا لە بڕ و سیستەمی دابەشکردندا، کۆبوونەوەیەکی راوێژکاریی ئەنجام بدەین".

ڕەوشی کارەبای نیشتمانی لەکاتی سەرما و گەرما کە هاوڵاتیان بڕێکی زیاتریان کارەبا پێویستە کەمدەبێتەوە و بە تایبەت لە زستاندا، کە هاوڵاتیان پێیان وایە ئەم کێشەیە کێشەی چەندین ساڵی ڕابردوو و بە چارەسەر نەکراوی ماوەتەوە.

وەزارەتی کارەبای هەرێمیش دەڵێت، دابەشکردنی نەوتی سپی بۆ ماڵان و نەبوونی سەرچاوەی دیکەی گەرمی وایکردووە کارەبای نیشتمانی زۆر بەکار بهێندرێت و بڕەکەی کەم بێتەوە.

476 جار خوێندراوەتەوە