مامۆستایەکی ئاینی کە پێشتر قسەی بە کچە گۆرانیبێژ ماریا هەورامی وتبوو ڕایگەیاند، داوای لێبوردن دەکات و قسەکانی شەرعی نەبووە، ئەو کچە گۆرانی بێژەش خزمیەتی و بەم نزیکانە دەچێت قسەلەگەڵ خۆی و خزمەکانی دەکات.

 

 هەڵۆ حەمە رەشید، مامۆستای ئاینی، لە ڕوونکردنەوەیەکدا لەسەر ئەو قسەپێوتنەی گۆرانی بێژەکە دەڵێت "ئەو ڤۆیسەم بڵاوبۆتەوە سەبارەت بەو خانمە بۆ ڕای گشتی نەبووە و وەڵامێک بووە بۆ کەسێک، لەگەڵ بڵاوبوونەوەی ئەو دەنگەش نەبووم و چونکە شەرعی نەبوو داوای لێبوردن دەکەم".

 

ئەو مامۆستایە دەڵێت "دوای بڵاوبوونەوەی دەنگەکەم کەسە نزیکەکانم پێیان وتم کە ماریا هەورامی خزمە و نەدەبوو بەو شێوەیە لەسەری قسەت بکردایە، بۆیە لێرەوە دەڵێم کەس خۆی بە خاوەنی ماریا نەزانێت و پێش هەمووتان من خۆم بە خاوەنی دەزانم چونکە خزمە".

 

هەڵۆ حەمە رەشید، ئاماژە بەوەشدەکات "ماریا دەتوانێت لەدادگا داوا پێشکەشبکات و هەرچی بێت من ئامادەم بچمەبەردەم دادگا، لەگەڵ ئەوەشدا سوکایەتی زۆر بەمن کراوە و قسەی زۆرم لە تۆڕی کۆمەڵایەتی پێ وتراوە".

 

ئەو مامۆستا ئاینییە دەشڵێت، ئەو سوکایەتی بە هەورامییەکان نەکردووە و خۆی هەورامییە و مامۆستاکانیشی هەورامی بوون، بۆیە قەت کارێکی واناکات.

دوای بڵاوبوونەوەی کلیپێکی خانمە گۆرانی بێژ ماریا هەورامی لە شەقامی سالم، کە شوێنێکی گشتییە و دەرکەوتنی چەندین هاوڵاتی و هەڵپەڕکێکردنیان، مامۆستا هەڵۆ حەمە رەشید لە دەنگە نامەیەکدا قسە بە ماریا دەڵێت و ئەوانەشی لە دەوروبەری گۆرانی بێژەکەن بە مەیمون وەسف دەکات.

17287 جار خوێندراوەتەوە