سێ دەیەمان تێپەڕاند لە حوکمڕانی کوردی؛  کەچی ھەندێک ڕەفتار لەدوای ئەم ماوەیە دووبارە دەبنەوە و دەگەڕێینەوە سەرەتا؛ لەقۆناغەکانی شەڕی ناوخۆدا؛ دەستگیرکردنی کادر و لایەنگری یەکتر سەری ھەڵدا؛ و ئێستاش درێژەی ھەیە؛ داڵدەدانی تۆمەتبار؛ و لە یاسا دەرچوەکان لای ئەم دوو حزبە بەردەوامە؛ حزب ھەم دادگایە؛ ھەم دادوەر؛ ھەمیش  حکومەت.

سەرۆکی حزب ھێز دروستدەکات؛ ھێز دەجوڵێنێ؛ تەدەخول لە دۆسیەکانی گەندەڵی؛ و قاچاغچێتیدا دەکات؛ بەرپرسی یەکە کارگێڕیەکان دادەنێت؛ و لادەبات؛ فەوزای ئیدارە و حوکمڕانی گەیشتوەتە ئاستێک؛ دامەزراوە یاساییەکان بەھایان بۆ نەماوەتەوە.

لەسەرەتاوە بڕوامان وابوە؛ لەم ھەرێمە؛ یاسا و دامەزراوە شەرعیەکان؛ حوکم ناکەن؛ حزب لەڕێگەی ھێزەوە تەحەکوم دەکات؛ بەڵام پێشتر بەرپرسە حزبی و بەناو حکومیەکان لەسەر ئاستی ھەرێمی و نێودەوڵەتی ڕوکەشی ئەم دۆخەیان کردبوو؛ بەوەی کە حکومەتێکی یەکگرتو ھەیە لە ھەرێم؛ بەڵام ئەم ڕوکەشکردنەش تەمەنی کۆتایی ھاتوە؛ و دەوڵەتان ئاگاداری دۆخەکەن.

ھەنوکە لە قۆناغی دیل بە دیل دا دەژین؛ قۆناغی ھەڕەشەکردن بە ئازادکردنی دیلەکان؛ ئەگەر لایەنی یەکەم دیلەکان ئازاد نەکات؛ ئەوا لایەنی دووەم دەستەوستان نابێت؛ و کاردانەوەی دەبێت.

ھەلومەرجەکە لەناوخۆدا شی بوەتەوە؛ و لە لێواری کەوتندایە؛ ئەوەی کە ھێشتویەتیەوە بەرژەوەندی وڵاتانی زلھێز؛ و ناوچەکەیە؛ لەلایەک؛ و لەلایەکی ترەوە نەبوونی ئەلتەرناتیڤی  ڕاستەقینەیە؛  لەڕابردودا ئەلتەرناتیڤی ڕاستەقینە ئامادەگی ھەبوو؛ بەڵام ئێستا لاوازبوە.

ئەگەرەکانی ئایندەی ھەرێم لە سێ سیناریۆ بەدەر نیە؛
سیناریۆی یەکەم: بە یەکگرتویی و بەھێزبونەوەی ھەرێم؛ ئەم سیناریۆیە تاقیکرایەوە و شکستی ھێنا؛ بەڵکو دابەشبونەکە حیبرەکەی تۆختر بوویەوە.
سیناریۆی دووەم: دوو ئیدارەیی؛ ئەمە چەک و ھەڕەشەی دەستی پارتی و یەکێتیە دژی یەکتر بەکاری دەھێنن؛ قۆناغی دوو ئیدارەیمان ئەگەر بەباشی تیایدا نەژیابین؛ لێکەوتە و کاریگەریەکانیمان بینیوە؛ کە فەشەل و شورەییەکی گەورەیە بۆ ھەرێم. حزب و کاربەدەستانی دوو ئیدارەیی؛ ھەمان حزب و کاربەدەستی حکومەتی شکستخواردوی یەکگرتوبون.
سیناریۆی سێھەم:
ڕووخان و لەناوچوونی ئەم حکومەتە؛ ڕەنگە ئەم سیناریۆیە بەھێزترین سینارۆ بێت؛ بە خوێندنەوەی واقعی ئێستا. چاکسازی ئەنجامنەدرا؛ و فەشەلی ھێنا؛ کاتێکیش ھیوای چاکسازی نامێنێت؛ ڕێگەی تازە دەدۆزرێتەوە