موقتەدا سەدر، ڕێبەری ڕەوتی نیشتمانیی شیعە، ئه‌مڕۆ پێنجشەممە، ئەوەی ناوی ناوە "میلیشیا بێشەرمەکان" بە بەرپرسیار زانی لە بەردەوامیی خوێنڕشتن لە عێراقدا و ڕایگەیاند، قەتیسنەکردنی چەک بەدەست دەوڵەتەوە هۆکاری گیانلەدەستدانی ژمارەیەک لە چەکدارانی حەشدی شەعبی و کارمەندانی هێزە ئەمنییەکان بووە.

سەدر لە پەیامێکدا کە لە تۆڕی کۆمەڵایەتی "ئێکس" بڵاویکردووەتەوە، ڕایگەیاند: "کردەوەی میلیشیا بێشەرمەکان و قەتیسنەکردنی چەک بەدەست دەوڵەتەوە هۆکار بووە و هێشتاش هۆکارە بۆ شەهیدبوونی چەکدارانی حەشدی شەعبی و هێزە ئەمنییەکان بەبێ هیچ پاساوێک".

ئاماژەی بەوەش کردووە، لە کاتێکدا ئەو کەسانە دەبنە قوربانی، سەرکردە و گەورەکانی ئەو میلیشیایانە لە ئارامی و پشوودان و بازرگانیدا دەژین، بۆیە داوا دەکات کۆتایی بەو ڕەفتارە تاکەکەسی و ناعەقڵانییانە بهێنرێت.

لە کۆتایی پەیامەکەیدا سەدر دەڵێت: "ڕەحمەت و ڕەزامەندی بۆ شەهیدەکانمان و سەبووری بۆ خێزانە بەڕێزەکانیان، بەڵام هیچ پرسە و سەرەخۆشییەکم نییە بۆ ئەوانەی ڕەفتارەکانیان هۆکاری لەدەستدانیان بووە."