دەستەی دەستپاکی فیدراڵی عێراق، هەڵوەشاندنەوەی گەورەترین تۆڕی گەندەڵیی لە شارەوانی دیوانییە ڕاگەیاند و نزیکەی 30 فەرمانی دەستگیرکردن و پشکنینی بۆ ژمارەیەک بەرپرسی پێشوو و ئێستا، بەڵێندەران و بەڕێوەبەرانی بەشەکان دەرکرد، کە تێوەگلاون لە دۆسیەکانی بەرتیل، بەهەدەردانی سامانی گشتی و بەرزکردنەوەی خەیاڵیی نرخەکان.

دەستەکە لە ڕاگەیەندراوێکدا ئاماژەی بەوە کردووە، تیمی نووسینگەی لێکۆڵینەوەکانیان لە دیوانییە بە هەماهەنگی لەگەڵ "شانەی هەڵۆکانی هەواڵگری"، ئۆپەراسیۆنێکی جۆرییان ئەنجامداوە و لە ئەنجامدا 15 فەرمانبەر و سێ بەڵێندەر دەستگیرکراون، کە کەرەستە و پێداویستییان بە نرخی زۆر خەیاڵی و چەند هێندە، یان بۆ پڕۆژەی وەهمی بە شارەوانی دیوانییە فرۆشتووە.

ڕوونیشیکردووەتەوە، دانپێدانانی تۆمەتباران بووەتە هۆی دەرکردنی فەرمانی دەستگیرکردن بۆ پێنج بەڕێوەبەری پێشووی شارەوانی دیوانییە و بەڕێوەبەری ئێستای فەرمانگەکە، لەگەڵ شەش بەرپرسی بەشەکانی ژمێریاری و وردبینی و بەڕێوەبەری ئێستای ژمێریاریی پارێزگاکە. لە ئێستاشدا بەڕێوەبەری کارا و چەند بەڕێوەبەرێکی پێشوو وتەیان لێ وەرگیراوە و تیمەکانی دەستەی دەستپاکیش بەدوای تۆمەتبارەکانی دیکەدا دەگەڕێن بۆ دەستگیرکردنیان.

لە بەشێکی دیکەی ئۆپەراسیۆنەکەدا، دەستبەسەر بڕێکی زۆر لە بەڵگەنامە و پسوڵەکانی خەرجکردندا گیراوە کە بڕەکەی زیاترە لە نۆ ملیار دینار، لەگەڵ چەندین مۆری ساختەی تایبەت بە لیژنەکانی کڕین، هۆبەی وردبینی، و باخچە و پارکی گشتی، هەروەها دەستبەسەر چەندین ئۆتۆمبێلی گرانبەها و بڕێک پارەی نەختینەدا گیراوە. هاوکات دادگای لێکۆڵینەوەی تایبەت بە کەیسەکانی دەستپاکی، بڕیاری ڕاگرتنی بۆ تۆمەتباران دەرکردووە و گەشتکردنیشی لە چەند ئەندامێکی ئەنجومەنی پارێزگای دیوانییە قەدەغە کردووە بەهۆی هەبوونی پەیوەندییان بە بەشێک لە تۆمەتبارەکانەوە.