وەزارەتی دارایی و ئابووریی حکومەتی هەرێمی کوردستان، قەبارەی داهاتی گومرگ و دەروازە سنوورییەکانی بۆ حەوت ساڵی ڕابردوو ئاشکرا کرد، کە لە ساڵی 2019 تا کۆتایی ساڵی 2025، کۆی گشتیی بڕەکەی زیاتر لە نۆ ترلیۆن و 500 ملیار دینار بووە.

بەپێی داتا و زانیارییەکانی پەرتووکی کار و چالاکییەکانی وەزارەتەکە، داهاتی گومرگ لەو حەوت ساڵەدا بە وردی گەیشتووەتە نۆ ترلیۆن و 547 ملیار و 323 ملیۆن دینار. وەزارەتی دارایی ئاماژە بەوە دەکات کە گۆڕانکاری و چاکسازییەکانی چەند ساڵی ڕابردوو لە دەروازەکاندا، کاریگەریی بەرچاویان هەبووە لە زیادبوونی جووڵەی بازرگانی، کەمبوونەوەی ڕۆتین و بەرجەستەکردنی شەفافیەت.

لە ئێستاشدا، تیمی حکومەتی هەرێمی کوردستان و وەزارەتی دارایی بە هەماهەنگی لەگەڵ حکومەتی فیدراڵی، سەرقاڵی جێبەجێکردنی سیستەمی "ئاسیکۆدا"ن لە دەروازەکانی هەرێم، ئەمەش بەمەبەستی ڕێکخستن و یەکخستنی کاروباری گومرگی و ترانزێت لە سەرتاسەری عێراق لە چوارچێوەی یەک سیستەمی یەکگرتوودا.

لە گرنگترین ئەو چاکسازییانەی لەسەر ئاستی بەڕێوەبەرایەتییەکانی گومرگ و خاڵە سنوورییەکان جێبەجێ کراون بریتین لە؛ بەئەلیکترۆنیکردنی کاروباری دەروازە سنوورییەکان و فڕۆکەخانەکان و بەستنەوەیان بە وەزارەتەوە، پێداچوونەوە بە ڕسوومات و پێناسەی گومرگی بۆ بەشێک لە کاڵاکان بە هاوبەشی لەگەڵ بەغدا، هەروەها هەڵوەشاندنەوەی بەشێک لەو لێخۆشبوونە گومرگییانەی پێشتر بەدەر لە یاسا و ڕێنماییەکان کرابوون.

هاوکات، هەماهەنگی کراوە لەگەڵ وەزارەتەکانی بازرگانی، کشتوکاڵ و دەستەی وەبەرهێنان بۆ پشتیوانیکردنی ئەو پڕۆژانەی لە چوارچێوەی یاسای وەبەرهێنان جێبەجێ دەکرێن. هەروەها سیستەمی ترانزێت بۆ ئاڵوگۆڕی بازرگانی لەگەڵ وڵاتانی ئێران، تورکیا و سووریا دانراوە، ڕێنماییەکانی هاوردەکردنی ئۆتۆمبێل هەموار کراونەتەوە، و بەڕێوەبەرایەتییەکانی چاودێریی گومرگی لە هەولێر، سلێمانی و دهۆک بە مەبەستی ڕێگریکردن لە قاچاخچێتی و سەرپێچیی یاسایی کارا کراون.