بزوتنەوەی گۆڕان پەیامێکی بڵاوکردەوە و هۆشداری لە پەرتەوازەیی ناوماڵی کورد دەدات، داواش دەکات لایەنە سیاسییەکان بەرژەوەندییە حزبییەکان تێپەڕێنن و کۆدەنگییەکی نیشتمانی دروست بکەن بۆ ڕووبەڕووبوونەوەی ئەو ئاڵنگارییانەی بەرۆکی ناوچەکەیان گرتووە.

لە پەیامەکەیدا کە ئەمڕۆ چوارشەممە بڵاوکراوەتەوە، بزوتنەوەی گۆڕان ئاماژەی بەوە کردووە، لە کاتێکدا شیعە و سوننەکان لە عێراقدا بۆ پاراستنی بەرژەوەندییەکانیان یەکیان گرتووە و بڕیارەکانیان یەکدەخەن، جێگەی داخە کە ناوماڵی کورد پەرتەوازەیە.

ڕوونیشیکردووەتەوە، تێپەڕبوونی پرسی هەڵبژاردنی سەرۆک کۆماری عێراق و پارێزگاری کەرکووک بەبێ ڕێککەوتنی لایەنە کوردستانییەکان، دەرهاویشتەی نەرێنی بۆ سەر هەرێمی کوردستان هەبووە و دەبێت.


بزووتنەوەکە هیوادارە ئەو ئەزموونەی پەرتەوازەییە نەگوازرێتەوە بۆ پرۆسەی پێکهێنانی کابینەی نوێی حکومەت و کاراکردنەوەی پەرلەمانی کوردستان. هاوکات دوور لە ململانێی تەسک، دەستی کاری پێکەوەیی بۆ هەموو لایەنە سیاسییەکان درێژ دەکات بە ئامانجی داڕشتنی ستراتیژێکی نیشتمانیی کوردستانی کە وەڵامدەرەوەی پێداویستییەکانی ئەم قۆناغە هەستیارە بێت.


لە کۆتایی پەیامەکەیدا، گۆڕان هۆشداری دەدات کە دابەشبوون بەسەر جەمسەرە عێراقی و هەرێمایەتییەکاندا سیاسەتێکی واقیعی نییە و لە دواجاردا هەرێمی کوردستان و دەستکەوتە دەستوورییەکانی باجەکەی دەدەن. جەختیش دەکاتەوە کە ڕێکخستنەوەی ناوماڵی کورد پێویستییەکی بنچینەییە بۆ پشتیوانیی دۆزی ڕەوای کوردستان لە پارچەکانی دیکەش.

دەقی پەیامەکە

پەیامێک لە بزوتنەوەی گۆڕانەوە

هاونیشتمانیانی خۆشەویست..

لە کاتێکدا ناوچەکە و عێراق بە قۆناغێکی پڕ لە ئاڵنگاری و ئاڵۆزیدا تێدەپەڕن، پاراستنی ئاسایشی نەتەوەیی و هەرێمی کوردستان، لە هەر کاتێک زیاتر پێویستی بە تێپەڕاندنی بەرژەوەندییە حیزبیەکان و گەڕانەوەیە بۆ پرەنسیپە نیشتمانییەکان.

دەبینین، گەلانی دەوروبەرمان سەرەڕای جیاوازیی ناوخۆییان؛ خاوەنی گوتارێکی یەکگرتوون. لە عێراقیشدا، پێکهاتە سەرەکیەکان بۆ پاراستنی پێگە و بەرژەوەندییەکانیان یەکیان گرتووە؛ شیعەکان لە چوارچێوەی هەماهەنگی و سوننەکان لە ئەنجومەنی سیاسیدا بڕیارەکانیان یەکدەخەن، لە بەرامبەردا جێگەی داخە، کە ناوماڵی کورد پەرتەوازەیە. 

بۆ کورد، کە خاوەنی مێژویەکی پڕ لە قوربانیدان و چەوساندنەوەی نەتەوەییە، لە هەرکات زیاتر پێویستمان بە لێکتێگەیشتنی هاوبەش و چوارچێوەیەکی کاری سیاسییە بۆ پاراستنی گەلەکەمان، دەستکەوتە دەستوورییەکانمان، ڕووبەڕووبوونەوەی ئەو هەڕەشە چاوەڕوانکراوانەی بەرۆکی ناوچەکەیان گرتووە.
بەداخەوە ئەزمونی گۆڕانکاری و پێشهاتە نوێیەکانی عیراق بەبێ ڕێکەوتنی نێوان لایەنە کوردستانیەکان  تێپەڕی، ئەم واقعەش دەرهاویشتەی نەرێنییان بۆ سەر دۆخی ناوخۆیی هەرێمی کوردستان هەبوە و دەبێت. 

لەم سۆنگەیەوە و لەسەر بنەمای ئامانجە نیشتمانیەکانی گۆڕان، لە بۆنەیەکی نەتەوەیی و نیشیمانیدا، کە یادی ڕۆژنامەگەری کوردییە، ئەم پەیامە ئاڕاستەی پارتە سیاسیەکان و ڕایگشتی کوردستان دەکەین:

١. دروستکردنی کۆدەنگی نیشتمانی ئەرکی لەپێشینەی هەموو لایەنە سیاسییەکانە، لەم چوارچێوەیەدا بانگەوازی کاری پێکەوەیی دەکەین، هیوادارین ئەزموونی پەرتەوازەیی نەگوازرێتەوە بۆ پرۆسەی پێکهێنانی کابینەی حکومەت و کاراکردنەوەی دامەزراوەی پەرلەمان.

٢. ڕێکخستنەوەی ناوماڵی کورد تەنها بۆ هەرێمی کوردستان گرنگ نیە، بگرە پێویستیەکی بنچینەییە بۆ پشتیوانی دۆزی ڕەوای کوردستان لە پارچەکانی دیکەش. لەم سۆنگەیەوە بانگەوازی ڕێکخستنەوەی ناوماڵی کوردی و کاراکردنەوەی دامەزراوە شەرعیەکان دەکەین.

٣. بزوتنەوەی گۆڕان، دوور لە ململانێی تەسک، دەستی کاری پێکەوەیی بۆ هەموو لایەنە سیاسیەکان درێژ دەکات، ئامانجمانە لەسەر بنەمای بەرژەوەندیی باڵای کوردستان هەموومان بەیەکەوە ستراتیژێکی نیشتمانی کوردستانی دابڕێژین، کە وەڵامگۆی پێداویستیە سیاسیەکانی ئەم قۆناغە هەستیارە بێت.

٤. بەیەکەوەبوون و دروستکردنی کۆدەنگیی کوردستانی ئەرک و هەنگاوی لەپێشینەییە. بە پێچەوانەوە دابەشبوون بەسەر جەمسەرە عێراقی و هەرێمایەتیەکان، سیاسەتێکی واقعی نیە و لەدواجاردا هەرێمی کوردستان و دەستکەتە دەستورییەکان باجی دەدەن.

بزوتنەوەی گۆڕان
٢٢ی نیسانی ٢٠٢٦