یەک ملیۆن کەس لە غەززە بێپەناگەن و لە سەرمای سەختی زستاندا لە خێوەتدا دەمێننەوە و مانگانەش هەزاران تۆن پاشماوەی شەڕ لادەبرێت.

هەواڵ:KNNC

نوسینگەی نەتەوەیەکگرتوەکان بۆ کاروباریی مرۆیی (OCHA)  هۆشداریی دا لە خراپی دۆخی ژیانی خەڵکی غەززە لە سەرمای زستاندا و ڕایگەیاند: یەک ملیۆن کەس لە غەززە بەهۆی شەڕ و ئاڵۆزییەکانی 2 ساڵی ڕابردوو، بێماڵ و بێپەناگەن و هیچ جیگەیەکیان نییە بۆ مانەوە.

نوسینگەکە ئاماژەی بەوەشداوە، هەرچەندە ئەوان لەڕێگەی تیمەکانیانەوە بەردەوامن لە هاوکاریکردنی ئەو خێزانانەی کە زۆرترین زیانیان بەرکەوتووە، بەڵام بە سەدان هەزار فەڵەستینیی لە چادر و خێوەتە کاتییەکاندا دەژین، لەگەڵ ئەوەشدا پەناگە کاتییەکانیشیان بەهۆی با و باران و شەپۆلی دەریاوە زیانیان پێگەیشتووە.

ئەوەش ڕوونکراوەتەوە کە لەدوای ئاگربەستی نێوان ئیسرائیل و حەمماسەوە تیمەکانیان لە غەززە مانگانە بە هەزاران تۆن پاشماوەی شەڕ لە کەرتەکە لادەبەن تا ژیان لە ناوچەکە بەرەو ئاساییبوونەوە و ئاسانبوون بچێت...