وەزیری دەرەوەی توركیا دەڵێت ؛ سیاسەتی شەڕانگێزانەی ئیسرائیل غەززەی تێپەڕاندوەو ئەنقەرەش رێگە نادات ئەو سیاسەتە بەردەوام بێت.

هەواڵ: KNN

هاکان فیدان، وەزیری دەرەوەی تورکیا ڕایگەیاند، بەهۆی بەردەوامی سياسەتي کۆمەڵکوژی دژ بە فەلەستینییەکان لە کەرتی غەززە، ئەنقەرە بڕیاریداوە هەموو پەیوەندییە ئابووری و بازرگانییەکانی لەگەڵ ئیسرائیل بپچڕێنێت و ئاسمانی وڵاتەكەشی بەڕووی فڕۆکە ئیسرائیلییەکاندا دابخات.

بەوتەی فیدان پلانەکانی ئیسرائیل بۆ داگیرکردنی تەواوی غەززە بەردەوامە و بە پشتیوانی بێسنوری ئەمریکاش هەوڵی لەناوبردنی چارەسەری دوو دەوڵەتی دەدات.

ئاماژەی بەوەشکرد، سیستەمی نێودەوڵەتی نەیتوانیوە بەرپرسیارێتی خۆی لە ئەستۆ بگرێت بۆ وەستاندنی کۆمەڵکوژییەکانی ئیسرائیل، جەختیشی لەوە کردەوە کە ئیسرائیل سیاسەتێکی دڕندانەی برسیکردن لە دژی فەلەستینییەکان لە غەززە پراکتیزە دەکات لە هەوڵێکدا بۆ دەرکردنیان.

وەزیری دەرەوەی تورکیا پێی وایە کە "سیاسەتە شەڕانگێزەکانی ئیسرائیل لە دەرەوەی غەززە تا قودس، کەرتی ڕۆژئاوا، سوریا، ئێران و لوبنان درێژبووەتەوەو تەلئەڤیڤیش
دەوڵەتێکی نوێی سوریای بەهێزی ناوێت، بەڵام تورکیا ڕێگە نادات ئەو سیاسەتانە بەردەوام بن.