وەزارەتی دەرەوەی ئەمریكا بڕیاریدا ڤیزەی چونە ژورەوە بۆ وڵاتەكەیان نەداتە سەرانی دەسەڵاتی فەڵەستینی تاوەكو نەتوانن بەشداری لەكۆبونەوەی داهاتوی نەتەوە یەكگرتوەكان بكەن.

هەواڵ: KNN

ئەمرۆ هەینی  حكومەتی ئەمریکا ڕایگەیاند؛ کە ڤیزە بە بەرپرسانی دەسەڵاتی فەلەستین نادات بۆ بەشداریکردن لە کۆبوونەوەی گشتی نەتەوە یەکگرتووەکان كە لە مانگی داهاتوودا  لەنیویۆك بەرێوەدەچێت و تیایدا فەرەنسا بە نیازە دان بە دەوڵەتی فەلەستیندا بنێت.

وەزارەتی دەرەوەی ئەمریکا لە بەیاننامەیەکدا ڕایگەیاندووە، "مارکۆ ڕوبیۆ، وەزیری دەرەوە، پێش کۆبوونەوەی گشتی نەتەوە یەکگرتووەکان، پێدانی ڤیزە بە ئەندامانی ڕێکخراوی ڕزگاریخوازی فەلەستین و دەسەڵاتی فەلەستین ڕادەگرێت و ئەوەش وادەكات مەحمود عەباس سەرۆکی دەسەڵاتی فەلەستین نەتوانێت گەشت بۆ نیویۆرک بکات بۆ وتاردان لە کۆبوونەوەی ساڵانەی نەتەوە یەكگرتوەكان.

لای خۆیەوە گیدیۆن سارا وەزیری دەرەوەی ئیسرائیل ستایشی بڕیارەکەی ئەمریکای کرد و سوپاسی دۆناڵد ترەمپ سەرۆکی ئەمریکا و ئیدارەکەی کرد بۆ "هەنگاوی بوێرانە و وەستانەوە لەگەڵ ئیسرائیل".