ڕوانگەی سووری بۆ مافەکانی مرۆڤ ئاشکرایدەکات، ژمارەی کوژراوانی شەڕ و گرژییەکانی سوەیدا لەنێوان سوپاى سوریا و چەکدارەکانى دروزەکان گەیشتە زیاتر لە 200 کەس.
لە راگەیەنراوێکدا ڕوانگەی سووری بۆ مافەکانی مرۆڤ ڕایگەیاند، لە ماوەى شەڕ و پێکدادانە چەکداریەکانى چەند رۆژى رابردوى نێوان سوپاى سوریا و چەکدارەکانى دروزەکان ژمارەى کوژراوەکان 200 کەسى تێپەڕاندوە و بەپێى زانیاریە بەردەستەکانیش 93 کوژراو ئەندامى هێزەکانى سەر بە سوپاى سوریان.
روانگەى سورى ئاماژە بەوەش دەکات، بەهۆی گرژییە ئەمنییەکان و داخستنی ڕێگا سەرەکییەکانەوە ناتوانرێت پێداویستی لە دەرەوەی شارەکە بگەیێنرێت و نیگەرانی هەیە سەبارەت بە کەمبوونەوەی خۆراک و دەرمانی پێویست، هاوکات چەندین هێڵی کارەبای گەورە لەکارخراون و بەهۆیەوە کارەبا لە گەڕەکەکانی شاری سوەیدا و ڕیفی ڕۆژئاوای ئەو شارە پچڕاوە و وێستگەکانی دابەشکردنی ئاویش لە کارکردن وەستاون.
49 جار خوێندراوەتەوە