بۆ جاری دوەم، ئاڵوگۆڕی دیلەكان لەنێوان كوردەكانی حەڵەب و بەرپرسانی دیمەشق بەڕێوەچو، لەو پڕۆسەیەدا 469 دیل لەنێوان هەردولا ئازاد كران 293 کەسیان شيرەڤان و هاوڵاتیی مەدەنی کورد بون.

هەواڵ:KNNC

ئەمڕۆ دووشەممە،   لە شاری حەڵەب بۆجاری دوەم و بەپێی ئەو ڕێككەوتنەی لە سەرەتای مانگی نیسانی ڕابردو لەنێوان ئەنجومەنی گشتیی شێخ مەقسود و ئەشرەفییە و ئیدارەی نوێی دیمەشق واژۆكرا، پرۆسەى ئاڵوگۆڕى دیلەکان بەڕێوەچو.

بەپێی میدیاکانى رۆژئاواى کوردستان، 469 دیل لەلایەن هەردولا ئازاد كران، لەوانە 293 یان شەڕڤان و هاوڵاتی مەدەنی كورد بون و 176 یان كارمەندی دەسەڵاتی دیمەشق بون.

لەسەرەتای مانگی نیسانی ڕابردو، ڕێككەوتن كرا بۆ ئاسایییكردنەوەی دۆخی گەڕەكە كوردنشینەكانی حەڵەب و پاراستنی دانیشتوانەكەی و ئاڵوگۆڕی دیلەكان، كە پێكهاتوە لە 14 بەندی سەرەكی و لەقۆناغی یەكەمدا، 146 دیل و 97 كارمەندی سەر بە حكومەتی دیمەشق ئاڵوگۆڕ كران.

بریار بو لە رۆژى 28ى مانگى ڕابردو، ئاڵوگۆڕى دیلەکان بەڕێوە بچێت، بەڵام بەهۆى ڕازینەبونى دیمەشق بە ئازادکردنى ژنە شەڕڤانانى یەپەژە، ئاڵوگۆڕکردنى پرۆسەکە دواخرا..