وەزارەتی تەندروستی حکومەتی هەرێم راگەیەنراوێکی لەبارەی پزیشکەکە و ئەو نەخۆشخانەیەش بڵاوکردەوە کە هاوڵاتییەک بەهۆی ئەنجامدانی نەشتەرگەری جوانکاری تێیدا گیانی لەدەستدا.

هەواڵ:KNNC

لە رونکردنەوەیەکدا وەزارەتی تەندروستی حکومەتی هەرێم دەڵێت: بڕیاریانداوە بە پێکهێنانی لیژنەیەکی لێکۆڵینەوە لەلایەن بەڕێوەبەرایەتی گشتی تەندروستی سلێمانی بەمەستی لێکۆڵینەوە لە کێشەی گیانلەدەستدانی هاوڵاتییەک بە ناوی (شۆخان عبدالله) لە شاری سلێمانی و لە نەخۆشخانەی (سەفین )ی تایبەت کە نەشتەرگەری جوانکاری بۆ ئەنجام درابو.

ئاماژەی بەوەشکردوە، وەزارەتی تەندروستی ڕێککاری توندی یاسایی گرتەبەر بەرامبەر بە پزیشک ( د. ئارام عبداللە محەمەد) بە ناونیشانی پزیشکی پسپۆڕی نەشتەرگەری گشتی راگرتنی لە کارکردن تا کۆتاییهاتنی کارەکانی لیژنەی لێکۆڵینەوە.

وەزارەتی تەندروستی دەڵێت: کاری پسپۆڕی ئەو پزیشکە نیە بۆ ئەنجامدانی ئەو جۆرە نەشتەرگەرییە بەڵکو ئەم نەشتەرگەریە کاری پزیشکی پسپۆڕی نەشتەرگەری جوانکاریە نەوەک نەشتەرگەری گشتی.

راشیگەیاند، پێبژاردنی نەخۆشخانەی (سەفین)ی تایبەت بەهۆی سەرپێچیکردنی یاسا و رێنماییەکان تایبەت بە نەبونی رێگەپێدانی کارکردنی پزیشکی ناوبراو لە لیستی میلاکی ئەم نەخۆشخانەیە.

هەروەها، داخستنی هۆڵەکانی نەشتەرگەری لە نەخۆشخانەی ناوبراو لەپێناو سەلامەتی نەخۆش و چارەسەریەکان.