لە وڵاتانی رۆژهەڵاتی ناوەڕاست هەریەك لە عێراق، سعودیە و ئوردن زۆرترین بڕە برنج لە ئەمەریكاوە هاوردە دەكەن و وەزارەتی كشتوكاڵی ئەو وڵاتەش رایدەگەیەنێت: بەبڕی (111) هەزار تۆن عێراق لە پلەی یەكەمدایە.


هەواڵ: (KNNC)


لە ڕاپۆرتێكدا وەزارەتی کشتوکاڵی ئەمەریکا ئاشكرایدەكات، لە ناوچەی رۆژهەڵاتی ناوەڕاست کە هەریەك لە عێراق، ئێران، سعودیە و ئیمارات دەگرێتەوە، زۆرترین بڕە برنجی وڵاتەكەی بۆ هاوردە دەكرێت، بۆیە پلەی سێیەمی جیهانی لە هاوردەکردنی برنجیان وەرگرتوە.

ئەوەیخستوەتەڕو، باشترین بازاڕ بۆ ساغكردنەوەی برجی ئەمەریكا عێراق، سعودیە و ئوردنن لە ناوچەكەدا.


رونیكردوەتەوە، لە ماوەی ساڵانی (2023 - 2024) عێراق نزیکەی (111) هەزار تۆن، لەدوای ئەویش بەبڕی (100) هەزار تۆن سعودیە و ئوردنیش بە (64) هەزار تۆن لە پلە یەكەم و دوەم و سێیەمدان بۆ هەناردەكردنی برج لە ئەمەریكاوە.

وەزارەتی کشتوکاڵی ئەمەریکا راشیگەیاندوە؛ لەناوچەی رۆژهەڵاتی ناوەڕاست برنجی ویلایەتە یەكگرتوكانی ئەمەریكا روبەڕوی كێبڕكێی قورس بوەتەوە بەتایبەتی لەگەڵ برنجی تایلەند و هندستان كە ئەوانیش هەوڵ دەدەن زۆرترین بڕە بەرهەمی وڵاتەكەیان ساغبكەنەوە.

لە ساڵی (2023)ـدا بەرهەمی برنجی ئەمەریکا گەیشتە نزیکەی سێ ملیۆن و (486) هەزار تۆن كە لە (2%)ـی كۆی بەرهەمی جیهانی پێك دەهێنێت، بەڵام وەزارەتی كشتوكاڵی ئەو وڵاتە ئاماژەی بۆ ئەوە كردوە كە (5%)ـی برنجی بازاڕەكانی جیهان دابین دەكات.