سایلۆی سلێمانی داوا لە بەشێک لەو جوتیارانە دەکات کە گەنمیان رادەست کردوە بچن شایستە داراییەکانیان وەربگرن و بەڕێوەبەری گشتیی بازرگانی و پیشەسازیی هەرێمیش دەڵێت، لە پێدانی پارەی جوتیاراندا رەچاوی بڕی گەنمەکە و وادەی رادەستکردنەکەی دەکرێت.


هەواڵ:KNNC


سایلۆی سلێمانی لە بڵاویکراوەیەکیدا داوای لەو جوتیارانە کرد کە گەنمیان رادەستی سایلۆکە کردوە و ژمارەی پسوڵەکانیان هەزار و 417 تا هەزار و 473یە،  بچن چەکی شایستە داراییەکانیان وەربگرن.

هاوکات نەوزاد شێخ کامیل بەڕێوەبەری گشتیی بازرگانیی و پیشەسازیی هەرێم رایگەیاند، پێدانی شایستە داراییەکان بە جوتیاران بەپێی وادەی رادەستکردن و بڕی گەنمەکەیە بە سایلۆ، ئەوانەی زوتر گەنمیان رادەستکردوە لەپێشترن.

بڕی ئەو پارەیەی دەبێت بەغداد وەک شایستەی دارایی جوتیاران بینێرێت بۆ هەرێم 483 ملیار و 596 ملیۆن دینارە و تا ئێستا 150 ملیار دیناری ناردوە، کە 67 ملیار و 84 ملیۆن دیناری بۆ سلێمانی و 47 ملیار و 373 ملیۆن دیناری بۆ هەولێر و 35 ملیار و 541 ملیۆنیشی بۆ دهۆکە.