وەزیری دارایی هەمو ئەو دەنگۆیانە رەت دەكاتەوە كە دابەشكردنی موچە دوادەكەوێت و رایدەگەیەنێت: نەختینەیی پێویست لەبەردەستدایە و لەكاتی خۆیدا موچە سەرجەم فەرمانبەرانی دەوڵەت دابەشدەكرێت، هاوكات راوێژكاری سەرۆك وەزیران جەخت دەكاتەوە دابەزینی نرخی نەوت كاریگەری لەسەر موچە نابێت.


هەواڵ: (KNNC)

تەیف سامی، وەزیری دارایی و ئابوری حكومەتی ناوەندی لە وڵامی پرسیارێكی ئەندامێكی ئەنجومەنی نوێنەرانی عێراق رایگەیاندوە: موچەی فەرمانبەران و خانەنشینان لە كاتی خۆیدا و بەبێ دواكەوتن دابەشدەكرێت.

وەزیری دارایی جەختی كردوەتەوە، ئەو دەنگۆیانەی باس لە دواكەوتی موچەی موچەخۆران دەكات دورە لە راستییەوە.

تەیف سامی ئاماژەی بۆ ئەوەشكردوە، نەختینەیی پێویست لەبەردەستدایە و لەكاتی خۆیدا موچە سەرجەم فەرمانبەرانی دەوڵەت دابەشدەكرێت.


لای خۆشیەوە، مەزهەر محەمەد، راوێژكاری سەرۆك وەزیران بۆ كاروباری دارایی بە میدیا عێراقییەكانی رایگەیاندوە: ئەو دەنگۆیانەی لەسەر دواكەوتنی موچە بڵاوكراونەتەوە سەرلەبەری ناڕاستە، دابەزینی نرخی نەوت كاریگەری لەسەر دابەشكردنی موچە نابێت.


راوێژكارەكەی سەرۆك وەزیرانی عێراق وتوشیەتی: لەریزبەندی خەرجییەكانی حكومەت، موچە كاری لەپێشینەیە لەبەر ئەوەی پەیوەندی بە گوزەرانی بەشێكی زۆری هاوڵاتییانی وڵاتەوە هەیە، بۆیە بەدڵنیاییەوە موچەی فەرمانبەران، خانەنشینان و چاودێری كۆمەڵایەتیی دوا ناكەوێت.