بەشێک لە مامۆستایانى وانەبێژ گردبونەوە و داواى دامەزراندن دەکەن و لە ئەگەرى وەڵامنەدانەوەیاندا هەڕەشەى بایکۆت دەکەن و دەڵێن: هەر زیانێک بەر خوێندن بکەوێت ئەوان لێی بەرپرسیار نابن.

 

هەواڵ:KNNC

 

ئەمڕۆ سێشەممە، بەشێک لە مامۆستایانى وانەبێژ لە سنورى ئیدارەى راپەڕین گردبونەوە و لەبارەى داواکارییەکانیانەوە بە کەى ئێن ئێنیان وت: ئەگەر وەک ساڵانى رابردو وەڵامى داواکارییەکانیان نەدرێتەوە هاوشێوەى رابردو بایکۆتى هۆڵەکانى خوێندن دەکەن.

 

ئاماژە بۆ ئەوەدەکەن کە بەڵێنەکانى حکومەتى هەرێمى کوردستان بۆ داواکانیان وەک بڵقى سەر ئاوە و هیچیان جێبەجێ ناکرێن، کە سەرەکیترینیان بەهەمیشەییکردنى وانەبێژان و پلەبەرزکرنەوەى مامۆستایانى میلاکە و جەختیش دەکەنەوە کە لە ئێستادا مانگێک بۆ کردنەوەى دەرگاى قوتابخانەکان ماوە و ئەگەر وەڵام نەدرێنەوە، دەرگاى ناوەندەکانى خوێندن دادەخەن.

 

ئەوەشیان ئاشکرا کرد کە ئەمساڵ جیاواز لە ساڵانى رابردو و بەشێوەیەکى جیاوازتر و توندترچالاکییە مەدەنییەکانیان دەستپێدەکەنەوە و چارەنوسى خوێندنیش لەدەستى مامۆستادا نەماوە و لەدەستى لایەنى پەیوەندیداردایە و پێویستە وەڵامیان بدرێتەوە.

 

مامۆستایەکى وانەبێژ لەبارەى داواکانیانەوە بە کەى ئێن ئێنى وت: لە کەرتەکانى دیکە و بەتایبەت کەرتى سەربازیی دامەزراندن نەوەستاوە، هەربۆیە ئەگەر وەڵام نەدرێنەوە و بایکۆت بکەن ئۆباڵى ئەو زیانانەى بەر کەرتى پەروەردە دەکەوێت دەکەوێتە ئەستۆى حکومەتى هەرێمى کوردستان.

 

وتیشى: مانگێکى دیکە دەرگاى خوێندن دەکرێتەوە، ئەگەر تا ئەوکاتە وەڵامى داواکانیان نەدرێتەوە بە دڵنیاییەوە زەنگى بایکۆت لێدەدەن و ئامادە نابن بچنەوە هۆڵەکانى خوێندن.

 

بەهەمیشەییکردنى مامۆستایان و فەرمانبەرانى گرێبەست، ماوەى چەندین ساڵە داوایەکە و حکومەتى هەرێمى کوردستان نەیتوانیوە جێبەجێی بکات، ساڵانە لە شار و شارۆچکە جیاوازەکان بایکۆتى خوێندن دەکرێت، بەڵام وەڵامێک رون و راشکاو نادرێتە ئەو مامۆستا و فەرمانبەرانە و ئێستاش مامۆستایان هەڕەشەى دوبارە بایکۆت دەکەن.

170 جار خوێندراوەتەوە