کۆمپانیاى فایزەرى ئەمەریکى بەرهەمهێنانى چارەسەرێکى لە شێوەى حەبدا بۆ توشبوانى کۆرۆنا راگەیاند و دەڵێت رێژەى کاریگەرییەکەى (89%) یە.

کۆمپانیاى فایزەر لە راگەیەنراوێکدا ئاشکرایکردوە، ئەنجامى ئەو تاقیکردنەوانەى کە بۆ ئەو حەبە کەتایبەتە بە چارەسەرى کۆرۆنا ئەنجامدراون، دەریخستوە رێژەى کاریگەرییەکەى (89%) یە.

ئەوەش دەبێتە دووەمین چارەسەرى لەو جۆرە کە بۆ چارەسەرى توشبوانى کۆرۆنا بەکاردەهێنرێت لە دواى ئەو حەبەى کە کۆمپانیاى میرک بەرهەمى هێنا.

کۆمپانیاى فایزەر ئاشکراشیکردوە، ئەوحەبە ناوى ( پاکسلۆفید)ە، بەنیازیشن لە نزیکترین کاتدا ئەنجامى تاقیکردنەوەکان پێشکەشى ئیدارەى خۆارک و دەرمانى ئەمەریکا بکەن بۆ ئەوەى رەزامەندى بدات بۆ بەکارهێنانى .

بەپێى راگەیەنراوەکەى کۆمپانیاى فایزەر، ئەو حەبە لەسەر (1200) توشبوى کۆرۆنا تاقیکراوەتەوە بە جۆرێک بۆ ماوەى پێنج رۆژ و لە هەر رۆژێکیشدا (12) کاتژمێر جارێک حەبەکەیان پێدراوە، کاریگەرییەکانیش دواى سێ رۆژ لەسەر ئەو کەسانە دەرکەوت کە ئەو چارەسەرەیان پێدراوە لە هەندێکیشیاندا دواى پێنج رۆژ کاریگەرییەکانى دەرکەوتن.