پارێزگاری سلێمانی ڕایگەیاند بەپێی بڕیارەکەی وەزارەتی ناوخۆی حکومەتی
هەرێم قەدەغەی هاتوچۆی تەواوەتی لە هەرسێ رۆژەکەی جەژنی ڕەمەزاندا جێبجێ دەکرێت.
د.هەڤاڵ ئەبوبەکر پارێزگاری سلێمانی لە لێدوانێکی تایبەتدا بە دیجیتاڵ
میدیای KNN ی ڕاگەیاند،بەڵام قەدەغەی هاتوچۆ تەنها ئەو سێ رۆژەی جەژن دەبێت و
دواتر ژیان ئاسایی دەبێتەوە و قەدەغەکە درێژناکرێتەوە.
وتیشی بۆ رێکارەکانی داهاتوو پەیوەست دەبێت بە زیادبونی حاڵەتەکانی
تۆمارکردنی کۆرۆنا و پێویستە هاوڵاتیان زۆر زیاتر پابەند بن بە رێنمایەکانەوە.
پارێزگاری سلێمانی داواشی لە هاوڵاتیان کرد خۆیان و کەس وکاریان بپارێزن و
پابەندی رێنما و رێکارە تەندروستیەکان بن و قەرەباڵغی دروست نەکەن.
ئەوە لەکاتێكدایە وەزارەتی ناوخۆی حکومەتی هەرێم بڕیاریداوە هەرسێ رۆژەکەی
جەژنی ڕەمەزان قەدەغەی تەواوەتی هاتوچۆ لەسەرجەم هەرێمی کوردستان جێبەجێبکرێت و
جگە لە دەرمانخانە ئێشکگرەکان سەرجەم دوکان ومارکێت و نانەواخانەکانیش دابخرێن و جوڵە
ڕابگیرێت.
7202 جار خوێندراوەتەوە