پارێزگاری سلێمانی چەند بڕیارێکی دەرکرد

06:16 - 08/04/2020
کوردستان

ئەمڕۆ پارێزگاری سلێمانی چەند بڕیارێکی نوێی دەرکرد.

 

هەڤاڵ ئەبوبەکر پارێزگاری سلێمانی و سەرۆکی لیژنەی باڵای ئۆپراسیۆنەكانی پارێزگای سلێمانی بۆ بەرەنگاربوونەوەی كۆرۆنا چەند بڕیاریکی دەرکرد.

 

دەقی بڕیارەکانی پارێزگاری سلێمانی؛

 

بۆ/ هەموو یەکە کارگێڕیی و فەرمانگە پەیوەندیدارەکانی سنوری پارێزگای سلێمانی

بابەت/ گشتاندن

لیژنەی باڵای ئۆپراسیۆنەکانی پارێزگای سلێمانی بۆ بەرەنگاربوونەوەی کۆرۆنا، بڕیاریدا بە:

 

١- لە سەعات (١٢)ی شەو تا سەعات (٨)ی بەیانی ڕێگا بە جوتیاران دەدرێت سەردانی کێڵگەو شوێنە کشتوکاڵییەکانیان بکەن، بە مەرجێک یەکێک لەم بەڵگەنامانە پیشانبدەن (گرێبەستی کشتوکاڵیی، خاوەندارێتی زەوی کشتوکاڵی بە تاپۆ، مۆڵەتی پڕۆژەکەی، بەڵگەیەکی فەرمیی کە سەلمێنەری کارە کشتوکاڵییەکەی بێت) و پابەندی تەواوی ڕێکارە تەندروستیی و کارگێڕیی و ئارامییەکان بن. لە سەعات (٤)ی پاش نیوەڕۆ تا سەعات (٦)ی پاش نیوەڕۆ ڕێگەیان پێ دەدرێت بگەڕێنەوە ناوشار، بەهەمان ئەو مەرجانەی سەرەوە.

 

٢- ئاڵوگۆڕو هاتووچۆی کۆمپانیاکانی پاسەوانیی (سکوریتی)؛ بەیانیان لەماوەی دوو سەعاتدا (٦-٨ی بەیانی)و ئێواران لەماوەی دوو سەعاتدا (٦-٨ی ئێوارە) دەبێت.

 

٣- لە ڕۆژی (١٢/ ٤/ ٢٠٢٠)ەوە دەست بە کوتان دژی سیل و هەوکردنی جگەرو ئیفلیجی مناڵان دەکرێتەوە بە دوو قۆناغ:

 

قۆناغی یەکەم ئەو مناڵانە دەگرێتەوە کە لەپێش (٢٠/ ٣/ ٢٠٢٠)دا لەدایکبوون و

 

لە قۆناغی دووەمدا ئەو مناڵانە دەگرێتەوە، کە لەدوای ئەو ڕۆژەوە لەدایکبوون، بەشێوەیەک کە خێزانەکان پابەند بن بە ڕێنماییە تەندروستیی و کارگێڕیی و ئارامییەکانەوە.

 

د. هەڤاڵ ئەبوبەکر

پارێزگاری سلێمانی

سەرۆکی لیژنەی باڵای ئۆپراسیۆنەكانی پارێزگای سلێمانی بۆ بەرەنگاربوونەوەی كۆرۆنا

٨ / ٤ / ٢٠٢٠

19212 جار خوێندراوەتەوە