وەزارەتی تەندروستی دەنگۆیەک لەسەر کۆرۆنا رەتدەکاتەوە

05:16 - 22/02/2020
کوردستان

وەزارەتی تەندروستی حکومەتی هەرێم رایگەیاند، ڕێکار و داوای یاسایی لە دادگا بەرامبەر کەسێک دەگرێتە بەر کە خۆی بە پزیشک ناساندووە و هاوڵاتیان تووشی دڵەراوکێ و ترس و تۆقاندن کردوە.

 

لە راگەیەندراوێکدا وەزارەتی تەندروستی ئاماژەی بەوەکردوە ئەو کەسە، بەبێ هیچ بنەمایەک و دوور لە راستی بەبێ ئەوەی کاری ئەو کەسە بێت هەستاوە بە بڵاوکردنەوەی هەواڵ و چەواشەکاری لە گرتەتەکی ڤیدیۆیی دا.

 

وەزارەتی تەندروستی ئاشکراشیکردوە ئیجرائاتی یاسایی بەرامبەر هەر کەسێک دەگیرێتە بەر پڕوپاگەندەی نادروست یان ڕیکلامی دۆزینەوەی چارەسەر و قسەی بێ بنەما بڵاوبکاتەوە.

 

هاوکات وەزارەتەکە، هاوڵاتیانیش دڵنیا دەکاتەوەهیج نەخۆشێک و گومانلێکراوێکی نەخۆشی کۆڕۆنا لە هەرێم نیە و پێویستە هاوڵاتیان نەشڵەژێن ڕێنماییەکانی تەندروستی بە هێمنی لەبەرچاو بگرن.

2507 جار خوێندراوەتەوە