نرخی 100 دۆلاری ئەمەریکیی 145 هەزار دیناری تێپەڕاند و هۆکارەکەشی بۆ زیادبوونی خواست و نەخستنەبازاڕی دۆلار دەگەڕێندرێتەوە و بەرزبوونەوەکە تا دوای سەریساڵە.

هەواڵ:KNNC

نرخی دۆلار ناجیگیرە لە بازاڕەکانی هەرێمی کوردستان و عێراق لە بەرزبوونەوەیەکی خێرادایە عێراق، بۆ ئەمڕۆش نرخی هەر 100 دۆلارێک 145 هەزار دیناری تێپەڕاند، لە کاتێکدا ئەمڕۆ لە کاتی کردنەوەی بازاڕدا، هەر 100 دۆلارێک بەرامبەربوو بە 143 هەزار و 750 دینار

بەو پێیەش تەنها لە دوێنێوە نزیک بە 3هەزار دینار چووەتە سەر نرخەکەی چونکە سەرەتای دوێنێ 100 دۆلار بە 142 هەزار و 500 دیناربوو.

بەرزبوونەوەی نرخی دۆلار بەو ناجێگیرییە لە 23ی ئەم مانگەوە بەردەوامە و نرخی هەر 100 دۆلارێک لە 142 هەزار و 50 دینارەوە ئێستا گەیشتوەتە سەرو لە 145 هەزار دینار واتا زیاتر لە 3 هەزار دینار نرخەکەی بەرزبووەتەوە.

ئەوەش هاوکاتە لەگەڵ ئەوەی کە نرخی فەرمی دۆلار لە عێراق هیچ گۆڕانکارییەکی بەسەردا نەهاتووە و مامەڵەکردنیش بە دراوە ئەمەریکییەکە لە بازاڕ و ئاڵوگۆڕگەکانی هەرێمی کوردستان و عێراق جیاوازیی هەیە، شارەزایانیش هۆکارەکەی تەنها بۆ خواستی هاووڵاتییان دەگەڕێننەوە چونکە لە ئێستادا بۆرسە داخراوە و دۆلار ناخرێتە بازاڕەوە تا دوای سەریساڵ، هەربۆیە لەدوای ئەو وادەیە دووبارە نرخی دۆلار دادەبەزێت...