232 خێزانی عێراقی کە 850 کەس دەبن، کەمپی هۆلیان لە باشووری حەسەکە لە باکووری ڕۆژهەڵاتی سووریا بەجێهێشت، پرۆسەکەش  بە هەماهەنگی نێوان  ئیدارەی خۆسەر و حکوومەتی عێراقە.

هەواڵ: KNN

ڕوانگەی سوری بۆ مافەکانی مرۆڤ بڵاویکردۆتەوە ئەمڕۆ پێنجشەممە 28ـی ئابی 2025، ئیدارەی کەمپی هۆڵ لە حەسەکە دیپۆرتکردنەوەی 850 هاووڵاتی عێراقی راگەیاندوە  کە نزیکەی 232 خێزان پێکدەهێنن.

ڕوانگەی سوری دەڵیت:  ئەم هەنگاوە لە چوارچێوەی هەوڵە بەردەوامەکاندایە بۆ بەتاڵکردنەوەی خێزانە بیانییەکان بەتایبەت عێراقییەکان لە کەمپەکەدا، لەبەر ڕۆشنایی هەماهەنگی ئەمنی و مرۆیی نێوان ئیدارەی خۆسەر و دەسەڵاتدارانی عێراق.

بەپێی زانیارییەکانی ئیدارەی کەمپەکە، ئەو کاروانەی گەڕاندنەوەی خێزانە عێراقییەکانی کەمپی هۆل بۆ وڵاتەکەیان، دەبێتە 19 هەمین کاروان، دەبێتە 12 هەمین کاروانی ئەمساڵیش، تا ئێستاش نزیکەی 6 هەزار عێراقی دیکە لە کەمپەکەدا ماون.

کەمپی هۆڵ، بە یەکێک لە ناوچە هەرە مەترسیدارو ئاڵۆزترین کەمپەکانی ناوچەکە دادەنرێت، کە هەزاران خێزان لە نەتەوە جیاوازەکاندا تیایدا نیشتەجێن بەردەوام شانە نوستووەکانی داعش هەوڵی خۆڕێکخستنەوە و ئەنجامدانی کردەوەی تێکدەرانەی تێدا دەدەن، هێزەکانی سووریای دیموکرات" هەسەدە" بە پشتیوانی هاوپەیمانان بە شێوەیەکی بەردەوام ئۆپەراسیۆنی کێوماڵکردن بۆ لەناوبردنی ئەو شانانە ئەنجام دەدەن و ناو بەناو گەورە داواکراوی داعشی تێدا دەستگیردەکەن، دیپۆرتکردنی ناو بەناوی خێزانە بیانیەکانی ناوی بەشێکە لە هەوڵەکان بۆ کەمکردنەوەی فشارە ئەمنی و مرۆییەکانی ناو کەمپەکە.