هەر قوتابییەکى پۆلە ناکۆتاکان، بەشدارى تاقیکردنەوەى 21 و 22ـى ئەم مانگەیان نەکردوە، جارێکى دیکە تاقیکردنەوەیان پێدەکرێتەوە و بەڕێوەبەرى پەروەردەى سلێمانیش دەڵێت: دەبێت لە 6ـى مانگى داهاتو کۆتاییان بێت.

هەواڵ:KNNC

نەژاد عەبدوڵا، بەڕێوەبەرى گشتى پەروەردەى سلێمانى دەڵێت: بەهۆکاری دواخستنی تاقیکردنەوەکانی خولی دوەمی پۆلە ناکۆتاکان قۆناغی (4 تا 11 ) جگە لە قۆناغی (9 و 12) هەر قوتابی و خوێندکارێک لە تاقیکردنەوەی رۆژی شەممە و یەکشەممە  21 و 22/6/2025  بەشداری تاقیکردنەوەی نەکردوە ئیدارەی قوتابخانە و خوێندنگەکان ئاگادار بکەنەوە کە تاقیکردنەوە بە قوتابی و خوێندکارانە بکەنەوە.

ئاماژە بۆ ئەوەکراوە کە دەبێت تاقیکردنەوەکان لە چوارچێوەی خولی دوەم بێت و نەبێتە خولى سێهەم، تەنها ئەو قوتابیانەش بگرێتەوە کە نەیان توانیوە بەشداربن لە تاقیکردنەوە.

بەپێی بڕیارەکە دەبێت لە هەمان بەرواری تاقیکردنەوەی پۆلە ناکۆتان واتە 6/7/2025 ئەم تاقیکردنەوانە کۆتاییان بێت ومامۆستایانیش دەبێت پرسیاری جیاواز دابنێن.