وتەبێژی وەزارەتی دەرەوەی تورکیا هەڵوێستی خۆی لەبارەی خستنەخوارەوەی درۆنەکەی لە کەرکوک رایگەیاند و دەڵێت: بۆ رونکردنەوە لەسەر ئەوەى لە کەرکوک رویدا لەگەڵ عێراق گفتوگۆمان کردوە.


ئۆنجۆ کەچەلی، وتەبێژی وەزارەتی دەرەوەی تورکیا لە لێدوانێکدا ئاماژەی بەوەکرد، لەپێناو رونکردنەوەی ئەوەی لە کەرکوک رویدا لەگەڵ بەرپرسانی عێراقدا هەماهەنگی و گفتوگۆمان کردوە.

راشیگەیاند؛ لەگەڵ عێراق ئیرادەیەکی هاوبەش و بەهێزیان بۆ روبەڕوبونەوەی تیرۆر هەیە کە ئەو هەماهەنگییە رۆژ بەڕۆژ بەهێزتر دەبێت.



بەیانی ئەمڕۆ پێنجشەممە، لە ئاسمانی کەرکووک و بەدیاریکراوی لەسەر گەڕەکی تسعینی شاری کەرکوک درۆنێکی گەورە خرایەخوارەوە، کە بەوتەی شانەی راگەیاندنی ئەمنیی عێراق، کاتژمێر 9:30ـی بەیانی درۆنەکەیان بینیوە و کاتژمێر 10:30ـی بەیانی خراوەتە خوارەوە. 


شانەی راگەیاندنی ئەمنی پشتڕاستی دەکاتەوە کە درۆنەکە "تورکییە و لەنێو شاری کەرکووک کەوتە خوارەوە لێکۆڵینەوە لەسەر هۆکاری کەوتنەخوارەوەی لێدەکرێت."