یەکێک لە کێشە باوە تەندروستییەکانی ئەم سەردەمە، دروستبونی گرژی ماسولکەکانە، بەتایبەت ماسولکەکانی پوز و شان ومل، کە زۆربەی جار هۆکارەکەی دەگەڕێتەوە بۆ ماندوبون و لایف ستایلی خراپ، کەمی خواردنەوەی ئاو و  زیاد خۆری لە خواردنی فاست فود و ناتەندروست.

تەندروستی:KNNC

د. هەڤین کەمال شا پسپۆڕی بەنج و ئازارشکاندن بڵاویکردوەتەوە، لە ئێستادا نێرگەلە کێشان و جگەرەی ئەلەکترۆنی و جگەرەی ئاسایی کاریگەری زۆریان هەیە لەسەر گرژبونی ماسولکەکان و خواردنەوەی ڕێژەیەکی زۆریش لە چا و قاوە و خواردنەوە گازییەکان کاریگەری خراپیان هەیە.

هەروەها باس لە چەند خواردن خواردنەوەیەک دەکات کە پێویستە زیاد بکرێت بۆ ژەمە خۆراکییەکان بەمەبەستی کەمکردنەوەی گرژی ماسولکەکان.

1-پەتاتەی شیرین: بەهۆی ئەوەی ماددەی کالسێۆم و مەگنیسێۆم و پۆتاسێۆمی تیادایە گرژی و ڕەقبوونی ماسولکە ناھێڵێت.

2-ئەڤۆکادۆ: رێژەیەکی زۆر پۆتاسێۆمی تیادایە کە ماسولکە خاوکەرەوەیە.

3-پاقلەمەنیەکان، فاسۆڵیا، لۆبیا، رێژەیەکی زۆر مەگنیسێۆمییان تیادایە کە ئازاری ماسولکە ناھێڵێت.

4-شوتی یاخود شەربەتەکەی ناھێڵێت ماسولکەکان وشک بنەوە، چونکە ڕێژەیەکی زۆر ئاوی تیادایە.

5-شیر یاخود بەرهەمە شیرەمەنیەکان کە ڕێژەیەکی زۆر پرۆتینی تیادایە و یارمەتی دروست بونەوەی خانە تێکشکاوەکانی ماسولکە دەدات.

6-سرکەمەنی یاخود ترشیات و خەیار شۆر، کاریگەری ھەیە لەسەر پاراستنی دەمارەکان کەئەویش دەبێتە ھۆی نەھێشتنی ئازار و رەقبونی ماسولکەکان.

7-سەوزە گەڵا تۆخەکانیوەکو سڵق و کاھوو و سپێناغ و ڕێژەیەکی زۆر کالسێۆم و ماگنیسێۆمیان تیادایە.

8-پرتەقاڵ و نارنج و سەندی،رێژەیەکی زۆر ئاو و پۆتاسێۆمیان تیادایە کەیارمەتی خاوکردنەوە و باشتر بونی ماسولکەکان دەدەن.

9-چەرەزات،بەھەموو جۆرەکانیەوە سەرچاوەیەکی باشن بۆ مەگنیسێۆم.

10-ماسی، بەتایبەتی جۆری سەلمۆن کە چەوریەکەی هانی چالاکبونی سوڕی خوێن دەدات کە کاریگەری ھەیە لەسەر کاری ماسولکەکان.

11-تەماتە، رێژەیەکی زۆر پۆتاسێۆمی تیادایە و یارمەتی خاوکردنەوەی ماسولکەکان دەدات.

12-خواردنەوەی ئاو : 12 پەرداخ و زیاتر لەڕۆژێکدا، ڕێگری دەکات لە وشکبوونەوەی ماسولکەکان و ئیش وکاریان چالاک دەکات.