بەڕێوەبەرى فریاکەوتنى خێراى سلێمانى ئامارى سێ رۆژى جەژنى قوربانى راگەیاند و دەڵێت: ئامارى روداوەکان بەراورد بە ساڵى رابردو کەمى کردوە، بەڵام ئەو روداوانەى بە ماتۆڕسکیل تۆمار کراون بەشێوەیەکى بەرچاو زیاد بون.

هەواڵ:KNNC

سامان نادر، بەڕێوەری سەنتەری فریاکەوتنی خێرای سلێمانی بە کەى ئێن ئێن،ى راگەیاند؛ لە یەکەم رۆژى جەژنى قوربان تا کاتژمێر (11:00)ـى نیوەڕۆى ئەمڕۆ 38 روداوى جۆراوجۆر تۆمار کراون.

ئاماژەى بۆ ئەوەکرد کە روداوەکان 17 روداویان بە ماتۆڕسکیل بوە و تەواوى روداوەکانیش مێرمنداڵ بون و تەمەنیان نەگەیشتوەتە 18 ساڵ و لەو روداوانەدا قاچ و دەستیان شکاوە.

وتیشى: جگە لەو روداوى ماتۆڕسکیلانە، هەشت روداوى هاتوچۆ و دوو حاڵەتى شەڕە چەقۆ و جەڵتە و کەوتنە خوارەوەش تۆمار کراون.

بەڕێوەبەرى سەنتەرى فریاکەوتنى سلێمانى ئەوەشى ئاشکرا کرد کە تا ئێستا هیچ حاڵەتێکى گیانلەدەستدان لە رۆژانى جەژنى قوربان تۆمار نەکراون و تیمەکانیشیان تا کۆتایی ئەمڕۆ لە حاڵەتى ئامادەباشیدا دەبن و 19 تیم بە بەردەوام لە ئەرکدان.

جەختیشى کردەوە کە روداوەکانى ئەمساڵ بەراورد بە ساڵى رابردو بەشێوەیەکى بەرچاو کەمى کردوە و ئەو روداوانەش تۆمار کراون هەمویان سەنتەرى شارى سلێمانى بون، وتى: ئەوەى جێی سەرنج بوە بۆمان تەنها زیادبونى ئەو روداوانە بوە کە بە ماتۆڕسکیل کراون.