گڵۆبەڵ پەتڕۆڵ: عێراق بۆ هەرزانی بەنزین یانزەیەمین وڵاتە لەسەر ئاستی جیهان

KNN : Kurdish News Network
12:30 - 21/09/2022
عێراق

پێگەی گڵۆبەڵ پێتڕۆڵ کە تایبەتە بە نرخی سوتەمەنی و وزەی کارەبا، لە راپۆرتێکدا ریزبەندی وڵاتانی لە روی نرخی بەنزینەوە بڵاوکردەوە بۆ مانگی ئەیلول و ئاماژەی بەوەشکردوە، عێراق یانزەمین وڵاتە لە جیهاندا لە نێوان ئەو وڵاتانەی بەنزینیان هەرزانە.

 

پێگەی گڵۆبەڵ پێتڕۆڵ رایگەیاند: 169 وڵات لە جیهاندا پلەبەند کراون بۆ هەرزانی نرخی بەنزین، لە عێراقدا بەنزین بە 5.4 سەنتە بۆ هەر لیترێك و بەمەش دەبێتە یانزەمین وڵات لە ریزبەندی ئەو وڵاتانەدا و لەسەر ئاستی وڵاتانی عەرەبیش لە دوای لیبیا و جەزائیر و کوێت چوارەمە.

 

ئاماژەی بەوەشکردوە، نرخی بەنزین ئوردون گرانترینە لە چاو وڵاتانی عەرەبیدا کە نرخەکەی دەکاتە یەك دۆلار و 74 سەنت.

 

گڵۆبەڵ پیتڕۆڵ دەڵێت: بەنزین لە ڤەنزوێلا زۆر هەرزانە و نرخی هەر لیترێك بەنزین بە دو سەنتە بەمەش پلەی یەکەمی گرتوە لە جیهاندا.

 

دەشڵێت: لیبیا دوەمین دەوڵەتە لە جیهاندا لە روی هەرزانی بەنزینەوە و نرخەکەی بە سێ سەنتە و ئێرانیش پلەی سێیەمی گرتەوە و بەنزین بە 5.3 سەنتە.

 

راشیگەیاند: گرانترین وڵات لە روی نرخی بەنزینەوە هۆنگ کۆنگە کە بە دوو دۆلار و 97 سەنتە و زیمبابۆی پلەی دوەمی گرتوە کە نرخەکەی بە دوو دۆلار و 570 سەنتە.

 

لە کۆتایی راپۆرتەکەیدا هاتوە، جیاوازی نرخی بەنزین لە وڵاتێکە بۆ وڵاتێکی دیکە دەگەڕێتەوە بۆ پاڵپشتی حکومەت بۆ بەنزین و رێژەی باج.

773 جار خوێندراوەتەوە