د. مارف عومەر گوڵ نوسەر و یاساناسی کورد کۆچی دوایی کرد

KNN : Kurdish News Network
11:30 - 15/01/2022
کوردستان

دکتۆر مارف عومەر گوڵ، نوسەر و یاساناسی کورد دوای ماوەیەکی زۆر ململانێی لەگەڵ نەخۆشیدا، ئەمڕۆ لە سلێمانی کۆچی دوایی کرد.


د.مارف عومەر گوڵ کێیە؟

- ساڵی (1956) لە گوندی هەشەزینی ناوچەی سەنگاوی سەر بە قەزای چەمچەماڵ لە دایک بوە.

- پسپۆری یاسایی نێودەوڵەتی و مامۆستای زانکۆی سلێمانی و نوسەر و ئەدیب و شاعیر، رۆڵى بەرچاوى هەبوە لە بەرەو پێشبردنى ئاستى زانست و مەعریفە لە کوردستان و بەتایبەت لە زانکۆی سلێمانی.

- ساڵی (1982) بڕوانامەی بەکالۆریۆسی لە یاسا لە زانکۆی بەغدا بەدەستهێناوە، هەمان ساڵ لە فەرمانگەی ئاودێریی سلێمانی دامەزراوە.

- یە‌که‌مین که‌سه‌ که‌ له‌ بواری جینۆسایدی گه‌لی کورددا ساڵی (1990) لە زانکۆی کییڤی ئۆکرانیا بڕوانامەی ماستەری بەدەستهێناوە و نامه‌ی ماسته‌ره‌که‌ی بەناونیشانی (ئامرازە یاساییەکانی بەربەندکردنی تاوانی جینۆساید لە یاسای گشتی نێودەوڵەتیدا) بوە.

- له‌ ساڵی (1995) بڕوانامه‌ دکتۆرای لە هەمان زانکۆ به‌ ده‌ستهێناوە و تێزی دکتۆراکه‌شی به‌ ناونیشانی "کێشەی کەسایەتی یاسایی نێونەتەوەی گەلی کورد لە یاسای نێودەوڵەتیدایه.

- له‌ ساڵی (1999) وه‌کو مامۆستا له‌ کۆلێژی یاسای زانکۆی سلێمانی ده‌ستبه‌کاربوە.
- ساڵی (2005-2006) بوەتە راگری کۆلێژی یاسا لە زانکۆی کۆیە و دواتر له‌ ساڵی (2011 -2015) راگری کۆلێژی یاسای زانکۆ سلێمانی و پله‌ی زانستی پرۆفیسۆره‌ و سەرپەرشتی چەندین تێزی ماستەرو دکتۆرای کردوە.

- ساڵی (1982) لەسەر هەڵوێستی سیاسی ماوەیەک لە زیندانەکانی (ئەمنی عامەی بەغداد) زیندانیی بووەو ئازارو ئەشکەنجەیەکی زۆر دراوه و هۆنراوه‌کانی دیوانی (خۆری زیندان)ی هه‌ر‌ لەزینداندا نوسیوون و دواتر پاش ئازاد بوونی چاپی کردون.

- له‌ ساڵانی هەشتاکاندا چەند ساڵێک ده‌چێته‌ شاخ و ده‌بێته‌ پێشمه‌رگه‌.

- شارەزایی لە زمانەکانی کوردی و فارسی و ئینگلیزیی هەبووە، دەیان کتێبی لە بوارەکانی یاسای نێودەوڵەتی و سوسیۆلۆژیا نووسیوە و زیاترلە (27) ساڵ لە زانکۆکانی هەرێمی کوردستان وانەی وتوەتەوە.

- خێزاندارە و باوكی دوو منداڵە (كوڕێك و كچێكە.

- سەرلەبەیانی رۆژی (15/1/2022) بەهۆی نەخۆشییەوە و مانەوەی نزیکەی (20) لە نەخۆشخانەیەکی شاری سلێمانی و مانەوەی لەژێر چاودێری پزیشکیدا، کۆچی دوایی کرد.

340 جار خوێندراوەتەوە