عەفرین؛ لە دوو مانگى رابردودا سێ هەزار دار زەیتون لەلایەن تورکیاوە بەتاڵان براون

KNN : Kurdish News Network
09:17 - 02/12/2021
کوردستان

رێکخراوێکى مافى مرۆڤ رایدەگەیەنێت؛ لە دوو مانگی رابردوودا (95) هاوڵاتى عەفرین رفێندراون، چەند کەسێکیش کوژراون و سێ هەزار دار زەیتوونیش لە لایەن هێزە سەربازییەکانی تورکیاوە تاڵان کراون.

ئاژانسى هەواڵى میهرى ئێرانى لە زارى رۆشین هیدۆ ئەندامی رێکخراوەی مافی مرۆڤی عەفرین بڵاوى کردۆتەوە، لە دوو مانگی رابردوودا (65) هاوڵاتى عەفرین رفێندراون و شەش کەسیش کوژراون سێ هەزار دار زەیتوونیش لە لایەن هێزە سەربازییەکانى تورکیاوە تاڵان کراون.

هیدۆ، وێڕای ئاماژە بە ڕوخاندنی بینا مێژویی و فەرهەنگییەکانی عەفرین لە لایەن تورکیاوە، باسى لەوەشکردووە، سوپاى تورکیا نەک هەر هێرش دەکەنە سەر مرۆڤەکان، بەڵکوو هێرش دەکەنە سەر بینا مێژووییەکانیش و دەیانڕووخێنن.

وتیشى" ئەو دار زەیتونانەى بەتاڵانبراون رەوانەی بازاڕ کراون کە رۆنی زەیتوون و زۆر شتی دیکە کە بژیوی ژیانی خەڵکی ناوچەی دابین دەکرد".

پێشتریش لە راپۆرتێكدا, گۆڤاری دێرشپیگلی ئەڵمانی رایگەیاندبوو: لە ئێستادا لە عەفرین كە توركیاو چەكدارەكانی سەربەو وڵاتە داگیرییان كردوە, پاكتاوی رەگەزی و كلتوری دەستیپێكردوە بە جۆرێك ناوە كوردیەكان بۆ توركی دەگۆڕێن و زمانی كوردی لابراوەو لە بری بە زمانی توركی وانە دەوترێنەوە.

ئەوەش لە کاتێکدایە، چەند جارێکى دیکە هێرش و تاڵانکارى بۆسەر کلتور و جوگرافیا و ناسنامەى عەفرەین کە زەیتونە، لەلایەن تورکیاوە ئەنجامدراوە و هەزاران درەختى زەیتونیان شێواندووە و بەتاڵانیان بردووە.

381 جار خوێندراوەتەوە