بە مەبەستی بەدواداچوون بۆ کێشە و گرفتەکانی جووتیاران، لیژنەی کشتوکاڵ لە پەرلەمانی کوردستان لەگەڵ وەزیرانی بازرگانیی و کشتوکاڵ کۆبونەوە.

لە کۆنگرەیەکی رۆژنامەوانی هاوبەشدا هەریەک لە وەزیرى بازرگانی و وەزیرى کشتوکاڵ، لەگەڵ لیژنەى کشتوکاڵ و ئاودێری لە پەرلەمانی کوردستان رایانگەیاند، هەوڵی بەردەوام دەدەن بۆ ئەوەی بازاڕ بۆ بەرهەم و بەروبومی ناوخۆیی بدۆزرێتەوە و بازاڕی شارەکانی عێراق باشترین بازاڕ دەبێت بۆ بەرهەمی جوتیارانی هەرێم.

کەمال موسلیم وەزیری بازرگانی و پیشەسازی هەرێم ئاماژەى بەوەکرد، لەهەوڵی بەردەوامدادەبن بۆ چارەسەرکردنی ئەو کێشە و گرفتانەی رووبەڕوی جوتیاران دەبێتەوە، بەتایبەت کاردەکەن بۆ پەیداکردنی بازاڕ بۆ ساغکردنەوەی بەرهەمەکانی جوتیاران.

هاوکات عەبدولستار مەجید سەرۆکی لیژنەی کشتوکاڵ و ئاودێری لە پەرلەمانى کوردستان رایگەیاند: "داوامان کردووە ئەگەر بە رێژەیەکی کەمیش بێت قەرەبووی ئەو جوتیارانە بکرێتەوە کە بەرهەمەکانیان ساغ نەبووەتەوە و بەهۆی بێبازاڕییەوە زەرەر و زیانێکی زۆریان کردووە.

هەر لە کۆنگرە رۆژنامەوانییەکەدا بێگەرد تاڵەبانی وەزیری کشتوکاڵ ئاماژەی بەوەکرد، ئەمساڵ لە پێناو ساغ بونەوەی بەرهەمی ناوخۆیی؛ بەرێژەیەکی زۆر بەرز باج خراوەتە سەر کاڵای هاوردەکراو.