وەفدى لایەنە سیاسیەکانى کورد و عەلاوى دووەم کۆبونەوە ئەنجام دەدەن

11:26 - 22/02/2020
کوردستان

دوەم کۆبونەوەی وەفدی لایەنە کوردیەکان و محەمەد تۆفیق عەلاوی راسپێردراو بۆ پێکهێنانی کابینەی نوێی حکومەتی عێراق بەڕێوەدەچێت، ئەندامێکی وەفدەکەش رایدەگەیەنێت، کۆبونەوەکە تەواوکارییە و بۆ بەرەوپێشبردنی رێککەوتنی نێوان هەرێم و بەغدایە.

 

لەبارەی ناوەڕۆک و ئامانجی کۆبونەوەکە، د. دەرباز محەمەد، ئەندامی خانەی راپەڕاندنی بزوتنەوەی گۆڕان و ئەندامی وەفدى لایەنە سیاسیەکانى هەرێمی کوردستان بە دیجیتاڵ میدیاى (KNN)ى راگەیاند، پێشنیوەڕۆی ئەمڕۆ شەممە وەفدی هەرێم بۆ جاری دووەم لەگەڵ محەمەد تۆفیق عەلاوی کۆدەبێتەوە، لە کۆبونەوەی یەکەمدا داواکاری و راسپاردەی لایەنە کوردستانیەکان بە کاندیدی راسپێردراو بۆ پێکهێنانی حکومەت گەیەندراوە و ئەم کۆبونەوەیەش تەواوکاری کۆبونەوەی یەکەمە.

 

ئاماژەى بەوە کرد، ئەجێندای کۆبونەوەکە پەیوەندیدارە بە میکانیزمەکان و چۆنیەتی بەرەوپێشبردنی رێککەوتنی هەولێر و بەغدا و پشکی کورد و موچەی فەرمانبەرانی هەرێم و شایستەی جوتیاران و ئەو پرسانەی پەیوەندی بە خەڵکی کوردستانەوە هەیە".

570 جار خوێندراوەتەوە