وەزیری بازرگانی و پیشەسازی رایگەیاند، حکومەتی هەرێمی کوردستان لە پلانیدایە کارگەیەکی گەورەی پترۆکیمیایی دابمەزرێنێت کە دەبێتە ئاسانکاریی بۆ دامەزراندنی چەندین کارگەی دیکە.

کەمال موسلیم وەزیری بازرگانی و پیشەسازی لە میانى بەشداریکردنى لە پانێڵى (ھەفتەی دەستپێشخەری کاری جیھانیی ھەولێر - زانکۆی کوردستان) وتی، بە ئامانجى بەگەڕخستنى تواناى لاوان و رەخساندنى هەلى کار بۆ دەرچوانى زانکۆ و پەیمانگاکان، پشتیوانیی وەبەرهێنەرانى ناوخۆ و بیانى دەکەن و کارئاسانییان بۆدەکەن.

وەزیری بازرگانی و پیشەسازی باسی لەوەش کرد، تەواوى هەوڵەکانیان خستووەتەگەڕ بۆ پێشخستنى کەرتى پیشەسازى و بازرگانى، ئەوەش لەپێناو هەمەجۆر کردنى سەرچاوەکانى داهات لە هەرێمى کوردستان، بۆئەوەى چیتر تەنها پشت بە نەوت نەبەسترێت.

بەپێى راگەیەندراوێکى وەزارەتى بازرگانى و پیشەسازى، ئەمڕۆ سێشەممە، کەمال موسلیم، لە کۆبونەوەیەکدا لەگەڵ ئۆلیڤیێ دیکۆتینى کۆنسوڵى گشتیى فەڕەنسا لە هەولێر، ئەوەى خستووەتەڕوو هانى کۆمپانیا و وەبەرهێنەرانى فەڕەنسا دەدەن کار و پڕۆژەکانیان لە هەرێمى کوردستان فراوان بکەن.

 کۆنسوڵى فەڕەنساش ئاشکراى کردووە، پلانیان هەیە بەم نزیکانە پێشانگایەکى تایبەت بە کەلوپەل و بەرهەمى کارخانە و کۆمپانیا فەڕەنسییەکان لە بوارەکانى خواردەمەنى، بیناسازى و میکانیکى لە هەولێر بکەنەوە.