زیاتر لە یەک ملیۆن و (200) هەزار، هاونیشتمانی هەرێمی کوردستان، ژیان و گوزەرانیان پەیوەستە بە موچەوە، بازاڕ و کاروکاسبی بەشێکی تری هاونیشتمانیانی تری هەرێم، هەر پەیوەستن بە موچەوە، چونکە جومگەکانی تری ئابوری لەهەرێمدا سست و لاواز و بێ بەرهەم کراون، ئەوەی رەوڕەوەی ئابوری هەرێم دەجوڵێنێت، تەنها موچەیە، موچەی مانگی پێنجی  بەر لەجەژنی قوربان نەدرا و سەدان و هەزاران موچەخۆر و خێزانیان لە خۆشی و چێژی جەژن بێ بەشکرد.


لەکاتی دابەشکردنی موچەدا، مانگانە بڕی یەک ترلیۆن دینار، دەچێتە گیرفانی هاونیشتمانیانی هەرێمەوە، نیوەی زیاتری ئەم گوژمەیە، دەستاودەست دەکات و بازاڕ دەجوڵێنێت.

ئەوەی لەم وتارەدا دەمانەوێت تیشکی بخەینە سەر، هاتنی گەشتیارانە بۆ هەرێم، لەئێستادا تاکە سەرچاوەی بەدەستگەشتنی پارە، گەشتیاران و سەردانیکەرانی خۆشەویستن.

سوپاس بۆ خوای گەورە، سەرجەم ڕەگەزەکانی کەرتی گەشتوگوزار لەهەرێمدا هەن، وەک ئاوهەوای فێنک و شوێن و جێگای گەشتیاری و سەرچاوەی ئاو، هتد. ئەمەش هاندەرێکی باشە بۆ ڕاکێشانی گەشتیاران بەتایبەت گەشتیارانی ناوەڕاست و باشوری عێراق.

بەهۆی گرنگی گەشتوگوزار و دەرئەنجامەدارایی و ئابورییەکانی ئەم کەرتە ستراتیژییە، کەزیاتر لەبەرژەوەندی هاوڵاتیانە، واباشترە لایەنەپەیوەندیدارەکان بەگشتی و هاوڵاتیانیش بەتایبەتی، ئەوپەڕی ئامادەکاری بکەن بۆ پێشوازی لەگەشتیاران، چونکە لەئێستادا تاکە ڕێگا بۆ داهات، گەشتیارانن.


لێرەوە داواکارین لەسەرجەم خاوەن شوێن و جێگاو سەیرانگاکان و ئوتێل و میوانخانەکانی هەرێم، بەوپەڕی توانای خۆیان بخەنەکار لەپێناو ڕازیکردنی گەشتیاران بەگشتی و گەشتیاران و سەردانیکەرانی ناوەڕاست و باشوری عێراقی گیرفانپڕ.


بۆئەوەی هیچ نەبێت لەم قەیرانە داراییەدا، سەرچاوەیەکی داهات هەبێت بۆ ڕێژەیەک لە هاونیشتیمانیان، کەواتە بەخێرهاتنێکی گەرمی گەشتیاران و سەردانیکەران دەکەین، هیوادارین ڕێژەیەکی زۆری گەشتیاران و سەردانیکەران، بچنە شوێن و هاوینەهەوارو سەیرانگاکان.